Samy stary ałtar Farnaha kaścioła ŭ Hrodnie budzie adnoŭleny

Pavodle słovaŭ ksiandza Jana Kučynskaha, padčas restaŭracyi ałtaru nadaduć pieršapačatkovy vyhlad, azdobiŭšy aryhinalnaj zachavanaj raźboj, ale źmieniać kałarystyku.

Pavodle histaryčnych krynic, ałtar datujecca 1664 hodam. Jon byŭ zbudavany ŭ draŭlanym kaściole sv. Apostałaŭ Piatra i Paŭła, a paźniej byŭ pieraniesieny ŭ kaścioł sv. Franciška Ksavieryja. Pavodle histaryčnych daviedak, u Farnym kaściole hety ałtar słužyŭ jak ałtar Maci Božaj Kanhrehackaj. Jość źviestki, što słužyŭ i hałoŭnym ałtarom. Paśla jaho pieranieśli ŭ kaplicu sv. Michaiła Archanioła ŭ levym niefie.

— Kali my raspačali restaŭracyjnyja pracy, to daviedalisia, što niz ałtara byŭ pierarobleny, — raspaviadaje ks. probašč Jan Kučynski. — Ciapier nieviadoma, kali adbyvałasia hetaja pierapracoŭka. Bačna, što dreva nie staroje — jamu dzieści kala sta hadoŭ. Vierchniaja častka ałtara zachavałasia aryhinalnaja. Jana mocna paškodžanaja. Mahčyma, jana nie ramantavałasia z tych časoŭ, a tolki pierafarboŭvałasia. U peŭny čas jana mieła ciomna-sini koler, charakterny dla ŭsiaho kaścioła.

Pavodle słovaŭ śviatara, ałtar cikavy tym, što maje zusim inšy vyhlad, čym usie astatnija ałtary Farnaha kaścioła. Taksama jon cikavy nakładnoj raźboj, jakaja bolš nidzie nie sustrakajecca.

— Pačynajučy restaŭracyju, my znajšli šmat raźby, jakaja budzie adnoŭlenaja i znoŭ prymacavanaja da ałtara. Hetaja raźba — svojeasablivaja mastackaja znachodka, bo ciapierašniaja była prymacavanaja kimści ź inšych ałtaroŭ, a my znajšli mienavita aryhinalnuju.

Adnak kałarystyka ałtara sv. Michaiła Archanioła budzie źmienienaja, kaža ks. Jan Kučynski:

— Kali my zrabili restaŭracyju hałoŭnaha ałtara, u vočy mocna pačaŭ kidacca bakavy. Hałoŭny ałtar maje koler šaravataha marmuru, ałtar Maci Božaj Kanhrehackaj — bolš błakitna-zialony, bieły marmur, a ałtar sv. Michaiła Archanioła — pad šera-zialony marmur. Takim čynam jon mocna vyłučaŭsia z unutranaha ŭbranstva chrama. Tamu my vyrašyli raspačać jaho restaŭracyju. I nie pamylilisia, bo kali pačali stavić ryštavańni, ubačyli, što naviersie ŭsio dreva prosta sparachnieła. U niejki momant jon moh i zvalicca, a hetaha źnizu nie było bačna. Ciapier my pracujem nad tym, kab umacavać ałtar, zachavać jahony pačatkovy vyhlad i nadać jamu novuju kałarystyku, padobnuju da ałtara Maci Božaj Kanhrehackaj. Heta robicca, kab u kaściole była adna koleravaja hama.

Praŭdapadobna, što ałtar byŭ pastaŭleny ŭ hetym miescy na chutkuju ruku — u jaho zzadu nie było nijakaj kanstrukcyi, jon prosta stajaŭ na doškach. Tamu ciapier robicca kanstrukcyja, kab jaho ŭmacavać.

Navukovy kiraŭnik restaŭracyjnych prac — hrodzienski mastak i restaŭratar Uładzimir Kisły, jon taksama robić restaŭracyju abraza. Taksama pracujuć restaŭratary ź Minska — Uładzimir Nikicin adkazny za restaŭracyjnyja pracy ałtara. Raniej płanavałasia skončyć restaŭracyju da śviata Božaha Naradžeńnia, adnak, ubačyŭšy stan ałtara, restaŭratary zrazumieli, što pracy zaciahnucca.

• 0
• 0
• 0
• 0
• 0
• 0
• 0
• 0