Aleh Daškievič. HRYPAVIRUS

HRYPAVIRUS

Pra toje, što našaje hramadztva chvareje, viadoma daŭna. Pra toje, što našaja ekanomika chvareje, my taksama viedajem daŭna. Taksama i z ekalohijaj, i z kulturaj, i z apazycyjaj. Vidać, nia chvoraja ŭ nas tolki ŭłada. Joj niama kali chvareć, jana zaniataja svaimi spravami — ekspansijaj na Ŭschod, rykańniem na Zachad i nacyjanalnym chakiejem. U peŭny čas dziaržaŭnyja čynoŭniki całujucca z rasiejcami, svaracca z NATO i hulajuć u chakiej. Tyja, chto im supraćstaić unutry krainy, hulajuć u hulni inšyja — jany šukajuć. Ahientaŭ u svaich šerahach. Hulnia cikavaja, apošnija kamputarnyja prydumki — nie kankurenty, tut ža — nijakaj virtualnaści. Z «ahientam» možna vypić filižanku kavy ci plašku piva, a paśla zaniacca vielmi cikavaj analityčnaj spravaj. Prykinuć usie «za» i «suprać», padzialicca kanfidencyjnaj infarmacyjaj z pravieranymi tavaryšami i vyznačyć plan dziejańniaŭ u hetym kirunku na zaŭtra.

Prablema «ahientaŭ» zaŭždy aktualnaja, tym bolej, kali nia ładziacca ŭłasnyja spravy, a pa rasiejskich kanałach šurujuć z zajzdrosnaj peryjadyčnaściu seryjały pra 007. Jak tut nie prasiaknucca prablematykaj.

U samych raznastajnych apazycyjnych arhanizacyjach ci niezaležnych srodkach masavaj infarmacyi, asabliva za čarkaj, tym bolš kali vy nia majecie dačynieńnia da chacia i bratniaj, ale kankurentnaj kantory, vam raspaviaduć pra «ahientaŭ» usio — rost, vahu, pamier botaŭ, na jakim paviersie žyvie, dzie i jakija zadańni vykonvaje, navat słužbovuju mianušku i parol. Usie šukajuć i... viadoma, znachodziać. Tym časam na mitynh da dziesiacihadovaha jubileju BNF ledź źbirajecca tysiača addanych fanataŭ, upłyŭ razam uziatych apazycyjnych partyjaŭ dobra kali siahaje dziesiaci adsotkaŭ, nakłady niezaležnych vydańniaŭ uražvajuć svaimi pamierami, a radyjostancyi — słuchackaj aŭdytoryjaj. Heta pry tym, što papularnaść navat hulajučaj u chakiej ułady nie raście. Moža, i tam užo pierastali hulać u chakiej i šukajuć... Dzie padzielisia źnikłyja pracenty papularnaści. Usie šukajuć, ad ekzaltavanych asobaŭ da arhanizacyjaŭ, jakija pretendujuć na salidnaść.

Vosień. Hrypavirus. Elektarat taksama šukaje... bulbu na paletkach i što tańniejšaje ŭ kramach. Dzie zarabić kapiejku i jak jaje zachavać.

Usio pierabłytałasia, usich apanavaŭ palaŭničy azart, usie zrabilisia «śmieršaŭcami» — śmierć špijonam. Kali źnikajuć hrošy — ahienty, kali zavaliłasia sprava — ahienty, dzicia ŭ škole dvojku atrymała — taksama «proiski», karaciej, tatalny nastup HB. Ci mahčyma pazbavicca ad HB? Ci mahčyma pazbavicca ad chimii, jakaja «široko prostirajet ruki svoi v dieła čiełoviečieskije»? Niekatoryja novapaŭstałyja aŭtarytety vyšuku ličać, što mahčyma. Ja ž ścipła miarkuju, što mafija nia hinie, tamu, šanoŭnyja spadarovie, chaj HB zajmajecca svajoj spravaj, a my — kožny svajoj, jak toj kazaŭ, Bohu bohava, HB hebešnaje. Žyvuć ža niekatoryja šmat hadoŭ z damavikami i barabaškami, i ničoha. Byvaje navat, što damaviki j barabaški prasiakajucca ichnymi prablemami i dapamahajuć, bo j damaviki, i barabaški —taksama ludzi, choć i byłyja, i ništo čałaviečaje im nie čužoje. Hałoŭnaje, kab usie pracavali prafesijna i rabili svaju spravu tak, kab za jaje nie było soramna. Profi budzie pavažna stavicca da profi, navat apanenta. Pakul ža, hledziačy na prafesijnuju dziejnaść apazycyjnych arhanizacyjaŭ i niezaležnaj presy, zastajecca adno šukać ahientaŭ. Ale kińcie durnoje, chaj HB hulaje ŭ svaje hulni z CRU, FSB, «Masadam» ci samo z saboj.

Praź niejki čas adkryjucca archivy, mahčyma, značna raniej, čym chtości sabie ŭjaŭlaje, i kožny z tych, chto prahnie daviedacca —chto, dzie j kali byŭ jaho «dobrazyčliŭcam», vidać, atrymaje takuju mahčymaść, bo napisana — niama ničoha tajemnaha, što nia stała b javaju, ale ci zrobicca ad hetaha lahčej, bo iznoŭ ža skazana — našyja viedy pamnažajuć naš smutak. A kab nie sumavać, pracujcie, spadarovie, pracujcie surjozna, na SVAJOJ działcy, bo što jość lepšaje za dobrasumlenna zroblenuju spravu, tady, moža, i paśla adkryćcia archivaŭ vy nia budziecie nadta sumavać, bo zrazumiejecie, što akazalisia macniejšymi, a dla mocnych ludziej heta nia suć važna, bo «jość rečy, važniejšyja za atamnuju vajnu».

Aleh Daškievič

• 0
• 0
• 0
• 0
• 0
• 0
• 0
• 0