Padziei
Biez rasiejskaha TV
Tadžykistan vyklučyŭ na svajoj terytoryi tranślacyju ORT i skaraciŭ na 8 hadzinaŭ tranślacyju RTR. Dušanbe tłumačyć heta tym, što rasiejcy nie płacili “za raspaŭsiudžvańnie syhnału”. Na minułym tydni Tadžykistan taksama daŭ amerykancam dazvoł na vykarystańnie svajoj pavietranaj prastory i vajskovych bazaŭ.
S.R.
Śmierć niezastrachavanaha
U Vilni ad sardečnaha prystupu pamior 62-hadovy hramadzianin Biełarusi. Jon nie dačakaŭ nieabchodnaj dapamohi ad medykaŭ, bo nia mieŭ medyčnaj strachoŭki. Trochdzionny kurs lačeńnia ŭ adździele kardyjalahičnaj reanimacyi j intensiŭnaj terapii kaštuje 400–600 dalaraŭ. Za chvoraha litoŭca hetyja hrošy płacić terytaryjalnaja Kasa chvorych. Lačeńnie zamiežnikaŭ apłačvajuć jany sami abo ichnaja strachavaja kampanija. Tak što, vypraŭlajučysia za miažu, nie škadujcie hrošaj na strachoŭku.
Vilenski
Viečny senatar
Samy stary amerykanski senatar Strom Turmand na minułym tydni samleŭ prosta ŭ Senacie. 98-hadovamu respublikancu z Paŭnočnaj Karaliny dapamahli ačuniać daktary, i senatar viarnuŭsia da pracy.
Usie chočuć bačyć
U suśvietnaj sietcy supermarkietaŭ Wall-Mart Stores u pieršyja dni paśla teraktaŭ u Amerycy na 70% pavialičyŭsia prodaž televizaraŭ i na 400% — televizijnych antenaŭ.
Polaroid — bankrut
Amerykanskaja kampanija Polaroid, što raspracavała technalohiju imhniennaha fatazdymku, dniami budzie pryznanaja bankrutam. Jejnaje finansavaje stanovišča pačało paharšacca šče pry kancy 90-ch, kali kampanija pačała vyrablać ličbavyja fatakamery j elektronnyja systemy kiravańnia dla kamputarnych sietak. Tym časam kankurenty na rynku fotatavaraŭ — kampanija Eastman Kodak — pajšła daloka napierad.
Amerykancaŭ pierakładajuć najbolš
Pavodle statystyki JUNESKA, na zamiežnyja movy najbolš pierakładajuć amerykanskich piśmieńnikaŭ (40%), na druhim miescy brytancy (25%), zatym niemcy (10%), francuzy (6%), rasiejcy (3%). Na dolu ŭsich astatnich zastajecca 16%.
Internet u škołach
90% škołaŭ Eŭraźviazu majuć dostup da Internetu. Adnak pamiž dziaržavami EZ isnujuć vialikija adroźnieńni ŭ dastupnaści Sieciva. Tak, u najbolš raźvitych na adzin padłučany da Sieciva kamputar prypadaje try vučni, u najmienš skamputaryzavanych — 50.
Luŭr na durnia
U Paryžy muzejnyja rabotniki pratestavali suprać skaračeńnia pracoŭnaha tydnia. U vyniku adny muzei nie pracavali, a druhija, u tym liku j Luŭr, byli adčynienyja dla biaspłatnaha naviedvańnia, bo nie było kamu praviarać kvitki.
Samacenzura
Dzieviać samych bujnych halivudzkich studyjaŭ da kanca hodu vypuściać tolki 16 filmaŭ (suprać 68, źniatych u kastryčniku—śniežni 2000 h.). Admieniena niekalki premjeraŭ vysokabiudžetnych blakbasteraŭ, u jakich idziecca pra terarystaŭ i vybuchi.
Sotavik i zdani
Brytanski akultyst Toni Korneł abvieściŭ u interviju Sunday Express, što vypramieńvańnie ad sotavych telefonaŭ zabivaje pryvidaŭ. Korneł kaža, što za 15 hadoŭ ad momantu źjaŭleńnia sotavych telefonaŭ kolkaść pryvidaŭ rezka źmienšyłasia: “Raniej my rehistravali pa dva novyja pryvidy štotydnia. A ciapier hety pakaźnik taki mały, što ja nie ździŭlusia, kali nieŭzabavie pryvidy j zusim źniknuć”.
U Litvu pa vizach
U 2003 h. biełaruskija hramadzianie pensijnaha vieku, što žyvuć u pamiežnych ź Litvoj rehijenach, pazbuducca prava jeździć tudy biaź vizy. Paŭnavartasny vizavy režym ź Biełarusiaj — adna z umovaŭ dałučeńnia Litvy da Eŭraźviazu. Jašče adna ŭmova — zakryćcio 23-ch pamiežnych punktaŭ. Zastanucca tolki čatyry bujnyja mytni, dzie budzie pravodzicca poŭny kantrol.
Učora Vini Puchu spoŭniłasia 75. Vinšujem jubilara!
Kamientary