Jan Pavał Vialiki pieršy z pap pačaŭ u pryvitańniach «urbi et orbi» na Vialikdzień i Naradžeńnie Chrystova pramaŭlać i pa-biełarusku. Kali Biełaruś była pad uładaj SSSR, Jan Pavał II dvojčy prymaŭ biskupa Časłava Sipoviča i biełaruskich śviataroŭ, jakija ŭ toj čas žyli ŭ volnym śviecie.
Jon pryznačyŭ pieršaha ŭ druhoj pałovie XX st. katalickaha biskupa na ziamli Biełarusi — haradzienca Tadevuša Kandrusieviča. U 1993 jon pavialičyŭ kolkaść dyjacezij u Biełarusi i pryznačyŭ pieršaha ŭ historyi biełaruskaha kardynała Kazimiera Śviontka. Praz napružanyja adnosiny Vatykanu z Rasiejskaj pravasłaŭnaj carkvoj Jan Pavał II tak i nia zmoh pryjechać u Biełaruś. Z susiedziaŭ Biełarusi jon naviedaŭ Polšču, Litvu i Ŭkrainu.
Pry im prajšła beatyfikacyja 13 pakutnikaŭ Padlaskich, zabitych rasiejskimi vojskami za niežadańnie pierachodzić z Unii ŭ pravasłaŭje ŭ XIX st. Byli taksama beatyfikavanyja 13 biełaruskich pakutnikaŭ časoŭ Druhoj suśvietnaj vajny i 11 siaścior-nazaracianak z Navahradku, jakich zabili niemcy.
Niekatoryja z encyklik Śviatoha ajca asabliva datyčyli Ŭschodniaj Eŭropy. Heta apostalski list «Magnum baptismi donum» («Vialiki dar chryščeńnia», 1988) z nahody śviatkavańnia chryščeńnia Rusi. Taksama encyklika pra słavianskich apostałaŭ Kiryła i Miatoda — «Slavorum apostoli». Paśla było apostalskaje nastaŭleńnie «Orientale lumen» («Śviatło Ŭschodu»), pra ŭschodnija cerkvy, u tym liku i pra Hreka-katalickuju carkvu. Adna z apošnich encyklik Jana Paŭła Vialikaha nazyvałasia «Ut unum sint» («Chaj usie buduć adno»). U joj havaryłasia pra patrebu prymireńnia pamiž chryścijanami, jadnańnia pravasłaŭnych i katalikoŭ.
Ad 2002 biełaruskaja mova źjaŭlajecca aficyjnaj movaj Kaściołu ŭ Biełarusi. Pa-biełarusku słužacca nabaženstvy i pramaŭlajucca kazańni ŭ bolšaści parafij Mienska-Mahiloŭskaj i Viciebskaj dyjacezij, viadziecca navučańnie ŭ Vyšejšaj seminaryi ŭ Pinsku. Biełaruskija słužby patrochu stali źjaŭlacca i ŭ kaściołach Haradzienskaj dyjacezii, dzie, jak i ŭ Haradzienskaj seminaryi, u cełym pa-raniejšamu panuje polskaja mova i duch polskaha nacyjanalizmu.
Z 1991 hodu vyjšli 22 rymska-katalickija i hreka-katalickija malitoŭniki pa-biełarusku. Dla paraŭnańnia, u pravasłaŭnych za hety ž čas vyjšła tolki pieravydańnie malitoŭnika mitrapalita Biełaruskaj aŭtakiefalnaj pravasłaŭnaj carkvy Mikałaja Macukieviča, a Biełaruski ekzarchat RPC takich vydańniaŭ nie rychtavaŭ uvohule.
Kali adznačaŭsia 25-hadovy jubilej pantyfikatu, Tavarystva biełaruskaj movy nakiravała Janu Paŭłu II admysłovaje vinšavańnie z padziakaj za pašyreńnie biełaruskaj movy ŭ Biełarusi i śviecie.
27 vieraśnia 2004 hodu papa ŭručyŭ kardynału K.Śviontku pačesnuju premiju «Śviedka viery».
Kamientary