Гандлёва-забаўляльны цэнтр над цэнтральным аўтавакзалам будзе называцца Galileo
Ён стане найбольшым у краіне і адкрыецца 1 мая 2013 года.
Прайшло больш за год з таго часу, як у Мінску пачаў працаваць пасля рэканструкцыі аўтавакзал Цэнтральны, і вось нарэшце здадзены ў эксплуатацыю і шматпавярховы гандлёвы комплекс на Прывакзальнай плошчы. Сёння гандлёва-забаўляльны цэнтр, які атрымаў назву Galileo, адчыніў дзверы для будучых арандатараў, якія павінны абжыць 57.000 квадратных метраў да 1 мая 2013 года.
Месца асвойвала вядомая ў Мінску дэвелаперская кампанія BNK Holding, якая будавала ўжо такія аб'екты, як Rubin Plaza і Silver Tower.
Імёны будучых арандатараў пакуль трымаюць у сакрэце, але ўжо вядома, што сем арандатараў працуюць над першым у Мінску фудкортам, а ўладальнікі Grand Café займаюцца кафэ з панарамным выглядам на Прывакзальную плошчу. Арандатарамі ўжо зарэзервавана 85% плошчаў у Galileo.
Асноўныя патокі спажыўцоў з грамадскага транспарту будуць трапляць на першы паверх, дзе размешчаны аператары сэрвісных паслуг, мабільнай сувязі, аптэка, ювелірная крама. Другі паверх - асноўная галерэя і два якарныя арандатары - харчовы і прадавец бытавой тэхнікі. Тут жа - большасць крам адзення і аксесуараў.
Гандлёвы цэнтр будзе прымаць да 30 тысяч наведвальнікаў у дзень. Асаблівая ўвага уладальнікаў - жаночага полу. Да паслуг аматарак шопінгу - усё, што належыць мець сучаснаму гандлёваму цэнтру, ад салонаў прыгажосці да пакоя маці і дзіцяці.
Наведвальнікі, якія прыехалі ў ГЦ на асабістым транспарце, змогуць скарыстацца двух'ярусным паркінгам на 500 месцаў і патрапіць у будынак з трэцяга паверху. Чацвёрты паверх комплексу зойме рэстаранная група, а вышэй - сямізальны кінатэатр. Паводле ацэнак экспертаў, акупіцца такі комплекс павінен у тэрмін да 10 гадоў.
Цяпер чытаюць
На фронце загінуў сын экс-кандыдата ў прэзідэнты Дзмітрыя Уса. Іван ваяваў за Расію5
Каментары