Лявон Халатран адкрыў з камандай бістро-бар у Варшаве — чым будуць здзіўляць?
Флэт брэд, польская мачанка, футурыстычная люстра ад беларускага мастака — Лявон Халатран з камандай адкрылі ў Варшаве новае бістро-бар Antresolec.
Бістро пад назвай Antresolec, акрамя адсылкі да вядомага слова, абыгрывае сваё размяшчэнне на карце горада — вуліцу Solec, якая знаходзіцца на адным з самых тусовачных участкаў Варшавы недалёка ад Віслы.
Новы праект Лявона Халатрана (колішняга кіраўніка руін-бара ОК16 у Мінску і экс-палітвязня), партнёра і шэф-кухара Уладзя і пяці інвестараў абяцае сучасную кухню з лакальнымі кампанентамі.
«Мы хочам гатаваць вельмі якасную ежу, смачную, па нармальных цэнах, без овер прайсу. Так, у нас ёсць такія пазіцыі як флэт брэд — гэта амерыканская невялікая піцуля з нетрадыцыйнымі для піцы начыннямі. Напрыклад, мідыямі ці качкай. Таксама ў нас будзе мачанка, але польская — у іх гэта бургер з тушанай, рванай свінінай. Плануем прадаваць польскія арганічныя віны і сідры», — расказвае Лявон.
Келіх віна ў бары абыдзецца ў 20 злотых (16 BYN), а флэт брэд будзе каштаваць каля 40 (32 BYN). У будні тут будуць падаваць аўтарскія абеды, а ў выходныя запрашаюць на сняданні.
Лявон кажа, што яны з камандай доўга абмяркоўвалі, як ім лепш падаваць свой беларускі эмігранцкі складнік, і прыйшлі да высновы, што беларускасць персаналу і часткі наведвальнікаў і так сфармуюць патрэбны дух.
«Дэфіцыту дранікаў ці сырнікаў у Варшаве сёння няма, таму нам важней быць інтэрнацыянальным месцам. Мы не адмаўляем свайго эмігранцкага пачатку, але паказваем, што мы цалкам сабе добра інтэгруемся ў польскае грамадства, бо жывём тут усё ж не першы год».
Шмат фізічнай працы ў бістро рабілася сваімі рукамі, на валанцёрскіх пачатках. У бар ужо ўклалі каля 45 тысяч даляраў. Дызайн інтэр’еру ў ім — справа рук беларускага мастака Сашы Адамава. Ён жа стварыў футурыстычную фотагенічную люстру для бістро.
Як Лявон будзе спалучаць працу ў бістро са сваімі іншымі праектамі, напрыклад, прасторай для імпрэз Kwatera 27?
«Бар для мяне ў прыярытэце. І насамрэч першапачаткова планаваўся ён, а па ходзе атрымалася і прастора. Але Kwatera 27 — культурны, некамерцыйны праект, які пакуль нічога не зарабляе. Бістро ж адразу планавалася камерцыйным».
Antresolec — не першае гастранамічнае месца, да якога ў Варшаве прыкладвае руку Лявон. Амаль адразу пасля эміграцыі з Беларусі ён займаўся барам BackDoor, але сышоў адтуль праз канфлікт з іншым уладальнікам. Пасля двух гадоў існавання BackDoor закрыўся. Лявон кажа, што ўлічыў папярэдні досвед, таму перад адкрыццём бістро яны падрыхтавалі пагадненне з правіламі паводзінаў падчас неспадзяваных сітуацый — яго падпісалі ўсе члены каманды.
Мацкевіч: Не пара аспрэчваць лідарства Ціханоўскай. Яна вельмі добрая ў якасці лідаркі6
Мацкевіч: Не пара аспрэчваць лідарства Ціханоўскай. Яна вельмі добрая ў якасці лідаркі
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары