Брэсцкая абласная арганізацыя Беларускай сацыял-дэмакратычнай партыі (Грамада) 23--25 сакавіка праводзіць мерапрыемствы, прымеркаваныя да 95-й гадавіны абвяшчэння Беларускай Народнай Рэспублікі.
Як паведаміў БелаПАН старшыня абласной структуры сацыял-дэмакратаў Ігар Маслоўскі, у Брэсце, Пінску, Баранавічах і Бярозаўскім раёне арганізавана трохдзённая інфармацыйная кампанія, у рамках якой партыйцы распаўсюджваюць спецыяльны тэматычны бюлетэнь абласной арганізацыі БСДП (Грамада) і іншыя друкаваныя матэрыялы, якія распавядаюць пра БНР.
"У гэтыя дні нашы актывісты таксама наведваюць памятныя мясціны, звязаныя з дзеячамі і падзеямі Беларускай Народнай Рэспублікі, праводзяць прымеркаваныя да Дня Волі круглыя сталы і адукацыйныя семінары. Ад імя абласной арганізацыі накіраваныя віншаванні з Днём Волі палітвязням", - распавёў Маслоўскі.
Па словах палітыка, абласной партыйнай структурай для берасцейцаў падрыхтаваны падарункі - магніты з сімволікай БНР. Яны размяшчаюцца на прыпынках грамадскага транспарту, дзвярах пад'ездаў жылых дамоў і ў іншых грамадскіх месцах.
"Цяпер важна распавесці насельніцтву пра Беларускую Народную Рэспубліку, паколькі дзяржаўныя органы замоўчваюць гэта значная падзея для краіны. Для нас распаўсюджванне такой інфармацыі з'яўляецца таксама партыйным абавязкам, паколькі менавіта нашы ідэйныя папярэднікі, прадстаўнікі Беларускай Сацыялістычнай Грамады ўпершыню ў гісторыі абвясцілі незалежнасць Беларусі. Мы лічым, што без абвяшчэння сацыялістамі БНР не было б БССР, а адпаведна і Рэспублікі Беларусь ", - заявіў палітык.
Каментары