Грамадскае аб'яднанне «Маладыя хрысціянскія дэмакраты» (МХД) мае намер вылучыць на мясцовых выбарах 2014 года прыкладна 50 кандыдатаў у дэпутаты.
Пра гэта было заяўлена 20 кастрычніка на ўстаноўчым з'ездзе арганізацыі ў Мінску.
Дэлегаты ўстаноўчага з'езда МХД мяркуюць, што выбары ў Беларусі не могуць быць дэмакратычнымі, пакуль у зняволенні знаходзяцца палітзняволеныя. Апрача таго, на іх думку, выбары нельга лічыць справядлівымі з улікам нерэгістрацыі ў краіне дэмакратычных партый і арганізацый, адсутнасцю свабоды СМІ, а таксама адсутнасцю на выбарах рэальнага кантролю за падлікам галасоў.
«Кампанія гэтак званых мясцовых выбараў, якую рыхтуе Ярмошына па старым сцэнарыі, з'яўляецца недэмакратычнай. Любыя вынікі такіх выбараў мы прызнаём нелегітымнымі», — гаворыцца ў заяве дэлегатаў з'езда.
Разам з тым удзельнікі з'езда лічаць прымальным ва ўмовах адсутнасці ніжняга парогу яўкі выбаршчыкаў на мясцовых выбарах правядзенне інфармацыйнай кампаніі праз вылучэнне кандыдатаў у дэпутаты. Пры гэтым прадстаўнікі МХД лічаць «недапушчальным заклік да грамадзян краіны браць удзел у самім галасаванні».
МХД плануе выкарыстоўваць мясцовую выбарчую кампанію для «данясення інфармацыі аб злачынствах, якія ажыццяўляе дзеючы рэжым, а таксама для арганізацыі моладзі на сумесныя дзеянні па абароне сваіх правоў». «Мы заклікаем усе маладзёжныя дэмакратычныя арганізацыі ў краіне аб'ядноўвацца на глебе прызнання выбараў у мясцовыя саветы недэмакратычнымі і нелегітымнымі. Заклікаем аб'ядноўвацца для правядзення сумесных нацыянальных кампаній, накіраваных на абарону правоў маладых людзей», — заявілі дэлегаты ўстаноўчага з'езда МХД.
Цяпер чытаюць
Трамп заявіў, што ідуць перамовы пра вызваленне яшчэ 50 беларускіх палітвязняў, і назваў іх «закладнікамі»44
Трамп заявіў, што ідуць перамовы пра вызваленне яшчэ 50 беларускіх палітвязняў, і назваў іх «закладнікамі»
«Як Вольскі прыходзіў з ператрусам да Коласа, а Крапіва і Глебка даносілі на калег». Апублікаваныя жахлівыя ўспаміны Рыгора Бярозкіна пра рэпрэсіі 1920—1940-х1515
Каментары