Аляксандр Малчанаў быў аштрафаваны судом за невыкананне патрабаванняў прэвентыўнага нагляду. Пра гэта былы палітзняволены паведаміў на сваёй старонцы ў «Фэйсбуку».
Малчанаў быў прызнаны вінаватым ва ўчыненні адміністратыўнага правапарушэння, прадугледжанага часткай 1 артыкула 24.12 КоАП.
«Я таксама прызнаў сябе вінаватым у тым, што забыўся з'явіцца для рэгістрацыі ў аддзел міліцыі. Суд пастанавіў спагнаць з мяне штраф у памеры шасці базавых велічынь у даход дзяржавы (780 тысяч рублёў)», — піша Малчанаў.
Ён таксама паведаміў, што 10 студзеня адбудзецца суд па пытанні працягу прэвентыўнага нагляду.
Нагадаем, у снежні Барысаўскі РАУС падаў хадайніцтва ў суд аб працягу ў дачыненні да Малчанава прэвентыўнага нагляду на паўгода з прычыны таго, што ён не з'явіўся адзначыцца ў крымінальную інспекцыю.
Першае пасяджэнне суда Барысава адбылося 4 студзеня, аднак разгляд справы па сутнасці быў перанесены на 10 студзеня.
Прэвентыўны нагляд у дачыненні да Малчанава завяршаецца 13 студзеня. Былы палітзняволены лічыць, што нават калі суд прыме рашэнне аб працягу нагляду, яно набудзе моц толькі праз 10 дзён, гэта значыць ужо пасля заканчэння нагляднага тэрміну.
«Пастанова не зможа набыць законную моц да заканчэння майго прэвентыўнага нагляду, а нагляд у мяне спыняецца 13 студзеня, пасля гэтай даты мне ніхто прадоўжыць нагляд не мае права», — раней пісаў у «Фэйсбуку» Малчанаў.
Нагадаем, што раней Малчанаў быў асуджаны па крымінальнай справе аб масавых беспарадках у Мінску 19 снежня 2010 года. Малады чалавек браў удзел у акцыі супраць фальсіфікацыі вынікаў прэзідэнцкіх выбараў, яго затрымалі 6 студзеня 2011 года ў Барысаве. 2 сакавіка 2011 года суд Фрунзенскага раёна Мінска прызнаў Малчанава вінаватым у масавых беспарадках і абразе дзяржаўных знакаў Беларусі і прыгаварыў да трох гадоў зняволення ў калоніі ўзмоцненага рэжыму. З магілёўскай калоніі № 15 Малчанава вызвалілі 14 верасня 2011 года паводле ўказу прэзідэнта аб памілаванні.
Цяпер чытаюць
Коўл: Мы абмеркавалі магчымую паездку Лукашэнкі ў ЗША28
Каментары