Руслана: Цітушкі выжылі мяне з дому, пагражаюць расправіцца як з Булатавым
На тэлефон спявачкі Русланы Лыжычкі паступаюць пагрозы фізічнай расправы. Пра гэта яна заявіла падчас Веча са сцэны Майдана.
«Цітушкі мяне фактычна выгналі з майго дома — яны ўвесь час дзяжураць каля яго. За маёй машынай сочаць. На тэлефон прыходзяць пагрозы аб фізічнай расправе. Мне цяжка звыкнуцца з тым, што мне тэлефануюць і пагражаюць, што зробяць са мною тое ж, што рабілі з Дзмітрыем Булатавым. Хачу спытаць — што такога супрацьзаконнага я раблю, каб дзейнічаць супраць мяне такімі метадамі?», — спытала са сцэны Майдана Руслана.
Паводле яе слоў, пагрозы пачаліся пасля таго, як у Еўропе яна казала пра санкцыі для ўлады Украіны.
«Фота тыдня ў Еўропе — я на вокладках ў многіх выданнях, дзе я трымаю фота і інфармацыю аб маёмасці і нерухомасці Януковіча, Клюева, Захарчанка. Мне сорамна, паважаныя, за тое, што вы зрабілі з краінай», — дадала яна.
«Я была ў Мюнхене, Брусэлі, Варшаве і ўсюды казала толькі пра адно — пра санкцыі», — адзначыла Руслана.
«Хай Януковіч падумае, у якім ён апынуўся становішчы. Сцягам ў Сочы махаць лёгка… Але ён першым назваў людзей з нацыянальным сцягам экстрэмістамі», — нагадала яна.
«Мовай запалохвання з намі размаўляць не трэба, нікому не дазволім. Стаю і буду стаяць на Майдане», — заявіла Руслана.
Цяпер чытаюць
Коўл: Мы абмеркавалі магчымую паездку Лукашэнкі ў ЗША11
Каментары