Узамен BASF атрымала 25 адсоткаў акцыяў даччыной кампаніі «Газпрому», якая будзе распрацоўваць вялізнае радовішча газу ў Паўднёвай Сібіры.
Расейскі гігант зрабіў чарговы крок, які набліжае яго да пабудовы газаправоду ў абыход краінаў Цэнтральнай Эўропы.
Расейскі канцэрн павялічыў у чацьвер з 35 да 50 адсоткаў мінус адна акцыя сваю долю ў газавай кампаніі Wingas, што валодае адной з найбольшых сетак газаправодаў у Нямеччыне. Ад сваёй часткі адмовіўся нямецкі хімічны канцэрн BASF, зь якім «Газпром» утвараў Wingas. Умова была падпісаная напярэдадні саміту ЭС-Расея і мае ключавое значэньне для пабудовы расейска-нямецкага газаправоду Nord Stream праз Балтыйскае мора, у якой бярэ ўдзел канцэрн BASF.
Ужо некалькі гадоў Wingas атрымліваў большую частку сыравіны акурат з Расеі, газапровадам «Ямад-Эўропа», што ідзе праз Польшчу. Наагул, стварэньне Wingas у 1993 годзе было зьвязанае з падпісаным у тым самым годзе пагаднаньнем ўрадаў Расеі і Польшчы пра пабудову гэтага газаправоду.
Wingas мае стаць галоўным уласьнікам праектаваных трубаправодаў OPAL i NEL, празь якія газ з балтыйскага трубаправоду мае бегчы празь Нямеччыну далей у Эўропу. Такім чынам, кампанія стане галоўным транзыцёрам расейскага газу ў Цэнтральнай Эўропе.
Wingas ужо зладзіў канфэрэнцыю ў Варшаве, дзе Польшчы было прапанавана будаваць злучэньне з газаправодам OPAL, то бок, фактычна, падлучэньне празь Нямеччыну да газаправоду Nord Stream, што Польшчу і Беларусь мінае.
Узамен за акцыі Wingas «Газпром» перадаў BASF 25 адсоткаў мінус адна акцыя даччыной кампаніі «Газпрому», якая будзе распрацоўваць вялізнае радовішча газу ў Паўднёвай Сібіры.
У дадатак да гэтага BASF атрымаў адну прывілеяваную акцыю сібірскай кампаніі, бяз права голасу, але з правам на дзясятую частку прыбытку.
За два гады з тых радовішчаў будуць здабываць 25 млрд кубамэтраў газу штогод. BASF будзе распараджацца адной чацьвертай гэтага аб'ёму, але бяз права на экспарт сыравіны, на што ў Расеі манаполію мае «Газпром».
Васкрасенскі: Адкрываецца неба — і Алесь Бяляцкі адразу выходзіць31
Каментары