Магілёўскі вышэйшы каледж МУС адкрыў набор дзяўчат на факультэт міліцыі
Конкурс чакаецца вельмі высокі: прыкладна 10 —15 чалавек на месца.
Магілёўскі вышэйшы каледж МУС адкрыў набор для дзяўчат на факультэт міліцыі па спецыяльнасці «прававое забеспячэнне грамадскай бяспекі».
Як паведаміў намеснік начальніка вышэйшага каледжа па ідэалагічнай працы і кадравым забеспячэнні палкоўнік міліцыі Уладзімір Святлічны, конкурс чакаецца вельмі высокі: прыкладна 10 —15 чалавек на месца.
Ужо зараз на сайце каледжа сярод жадаючых паступіць у навучальную ўстанову зарэгістраваліся 62 дзяўчыны, а на падрыхтоўчым аддзяленні каледжа навучаюцца 28. Па дадзеных райаддзелаў АУС Беларусі, 159 дзяўчат падалі заявы і афармляюцца ў якасці абітурыентаў.
«Ва ўсіх дзяўчат маецца магчымасць прайсці нашы падрыхтоўчыя курсы, якія значна павышаюць шанцы на паступленне ў ВНУ. У мінулым годзе 94% слухачоў, якiя прайшлi поўны курс навучання, сталі курсантамі або студэнтамі вышэйшых навучальных устаноў. Акрамя таго, слухачы, якія прайшлі навучанне на падрыхтоўчых курсах, маюць пераважнае права пры залічэнні ў Магілёўскі вышэйшы каледж МУС», — адзначыў Уладзімір Святлічны.
Поўны тэрмін навучання складае 4 гады, пасля выдаецца дыплом аб вышэйшай адукацыі з прысваеннем кваліфікацыі «юрыст» і спецыяльнага звання сярэдняга начальніцкага складу органаў унутраных спраў Беларусі «лейтэнант міліцыі».
З 1 верасні 2014 г. Магілёўскі вышэйшы каледж МУС будзе называцца Магілёўскім інстытутам міністэрства ўнутраных спраў, і таму абітурыенты, якія паступілі ў 2014 годзе ў каледж, атрымаюць у 2018 годзе дыплом аб заканчэнні інстытута.
Каментары