Жыхарку Свіслацкага раёна, якая заблукала ў лесе, знайшлі праз тыдзень пошукаў з дапамогай ваеннага верталёта. Аб гэтым паведаміў прэс-сакратар УУС Гродзенскага аблвыканкама Уладзімір Козыраў.
73-гадовая жыхарка вёскі Ражкі Свіслацкага раёна сышла з дому 12 мая. Сведкі бачылі, як яна каціла ровар па кірунку да вёскі Грыцэвічы Бераставіцкага раёна. Калі да раніцы пенсіянерка дадому не вярнулася, сваякі звярнуліся за дапамогай у Свіслацкі РАУС.
Жанчыну шукалі ўвесь тыдзень. На ногі былі паднятыя праваахоўнікі, супрацоўнікі МНС, лясніцтва, валанцёры пошукава-выратавальнага атрада «Анёл», аднак усё было дарэмна. На шосты дзень нечакана сваякам патэлефанавалі. Зніклая датэлефанавалася ім па мабільным тэлефоне і паведаміла, што заблукала і знаходзіцца ў незнаёмай мясцовасці пасярод лесу на невялікі забалочанай паляне. Дзякуючы гэтаму званку ўдалося звузіць кола пошуку.
Як распавёў намеснік начальніка Свіслацкага РАУС па ідэалагічнай рабоце і кадравым забеспячэнні падпалкоўнік міліцыі Павел Пянткоўскі, для пошукаў жанчыны ўпершыню задзейнічалі верталёт. Упраўленне крымінальнага вышуку УУС Гродзенскага аблвыканкама звярнулася па дапамогу да вайскоўцаў. На Пружанскай авіябазе адгукнуліся імгненна і даслалі верталёт Мі-8. З яго дапамогай бабульку ўчора ўвечары ўдалося знайсці жывы і цэлай. Яна сядзела на краі балаціны каля ракі Свіслач прыкладна за 2 км ад вёскі Чаплічы Бераставіцкага раёна. Яна была моцна аслабленая, знясіленая, аднак яе жыццю нічога не пагражае.
У прэс-службе УУС паведамілі, што зазвычай пенсіянеры губляюцца, сыходзячы з дому і не папярэджваючы сваіх блізкіх ні пра мэты, ні пра маршруты сваіх падарожжаў. Напярэдадні ягадна-грыбнога сезону праваахоўнікі нагадваюць жыхарам вобласці аб тым, што, выпраўляючыся ў лес, неабходна мець з сабой зараджаны мабільны тэлефон, запас ежы, ліхтарык, нож, компас, запальнічку, лекі. Пажадана надзець яскравую вопратку са святлоадбівальнымі элементамі.
Цяпер чытаюць
«У палітыцы была справа». Лукашэнка высветліў, чаму беларусам не хапіла бульбы5
Каментары