Урад Беларусі зацвердзіў пражытачны мінімум для асноўных сацыяльна-дэмаграфічных груп насельніцтва і Палажэнне аб парадку разліку бюджэту пражытачнага мінімуму па асноўных сацыяльна-дэмаграфічных групах і ў сярэднім на душу насельніцтва.
Такое рашэнне змешчана ў пастанове Савета Міністраў ад 4 верасня 2014 года нумар 865, якая ўступае ў сілу з 17 верасня, паведамілі ў прэс-службе беларускага ўрада.
Як адзначыла начальнік упраўлення комплекснага аналізу Міністэрства працы і сацыяльнай абароны Таццяна Юшкевіч, пастанова нумар 865 распрацавана ў адпаведнасці з артыкулам 5 закона «Аб унясенні змяненняў і дапаўнення ў некаторыя законы Рэспублікі Беларусь па пытаннях вызначэння пражытачнага мінімуму».
Цяпер пражытачны мінімум складаецца з мінімальных набораў прадуктаў харчавання для асноўных сацыяльна-дэмаграфічных груп насельніцтва; нехарчовых тавараў і паслуг, кошт якіх вызначаны як фіксаваная доля ў памеры 77 працэнтаў ад кошту мінімальнага набору прадуктаў харчавання.
«Наборы прадуктаў харчавання сфарміраваны на аснове норм фізіялагічных патрэбнасцей у харчовых рэчывах і энергіі для розных груп дарослага і дзіцячага насельніцтва. Прадуктовыя наборы адпавядаюць патрабаванням рацыянальнага харчавання і захоўваюць неабходную энергетычную каштоўнасць і хімічны састаў, — растлумачыла прадстаўнік міністэрства. — Фіксаваная доля вызначана на падставе афіцыйнай статыстычнай інфармацыі Белстата аб фактычных спажывецкіх расходах малазабяспечаных дамашніх гаспадарак за апошнія пяць гадоў (з 2009 па 2013 год уключна), а таксама за першы квартал бягучага года».
Паводле яе слоў, для вызначэння фіксаванай долі нехарчовых тавараў і паслуг улічваліся такія спажывецкія артыкулы расходаў малазабяспечаных дамашніх гаспадарак, як расходы на адзенне, абутак, тканіну; мэблю, прадметы бытавога прызначэння; асабістыя паслугі, прадметы асабістага карыстання; жыллёва-камунальныя паслугі; ахову здароўя; паслугі адукацыі; паслугі грамадскага транспарту; сувязь.
Палажэннем вызначаны парадак разліку бюджэту пражытачнага мінімуму (БПМ), замацоўваецца перыяд дзеяння БПМ пры яго штоквартальным зацвярджэнні Міністэрствам працы і сацыяльнай абароны (да гэтага часу БПМ зацвярджаўся рашэннем урада).
Міністэрствам працы і сацыяльнай абароны БПМ па асноўных сацыяльна-дэмаграфічных групах і ў сярэднім на душу насельніцтва будзе зацвярджацца (як і раней урадам) у цэнах апошняга месяца кожнага квартала. Так, БПМ на перыяд з 1 лютага па 30 красавіка - у цэнах снежня; з 1 мая па 31 ліпеня — у цэнах сакавіка; з 1 жніўня па 31 кастрычніка — у цэнах чэрвеня; з 1 лістапада па 31 студзеня — у цэнах верасня.
БПМ разлічваецца для шасці асноўных сацыяльна-дэмаграфічных груп насельніцтва — працаздольнае насельніцтва; пенсіянеры; студэнты; дзеці ва ўзросце да 3 гадоў; ад 3 да 6 гадоў; ад 6 да 18 гадоў.
У якасці бюджэту пражытачнага мінімуму ў сярэднім на душу насельніцтва прымаецца сярэднедушавы бюджэт пражытачнага мінімуму сям'і з чатырох чалавек.
Кошт прадуктаў харчавання, што ўключаецца ў БПМ у сярэднім на душу насельніцтва, вызначаецца як кошт мінімальнага набору прадуктаў харчавання для сям'і з чатырох чалавек (мужчыны працаздольнага ўзросту, жанчыны працаздольнага ўзросту, хлопчыка ва ўзросце 13 гадоў і дзяўчынкі ва ўзросце 7 гадоў).
Парадак разліку расходаў на ўзносы і плацяжы не змяніўся для БПМ у сярэднім на душу насельніцтва і для БПМ працаздольнага насельніцтва.
Цяпер чытаюць
Бліжэйшым часам будуць вызвалены больш за 150 палітзняволеных22
Каментары