Магілёўскія вучні просяць Колю Лукашэнку дапамагчы ў добраўпарадкаванні школьнай тэрыторыі
У Магілёве 15 вучняў сярэдняй школы № 33 падпісаліся пад лістом да сына беларускага кіраўніка Мікалая Лукашэнкі з просьбай дапамагчы ў добраўпарадкаванні прышкольнай тэрыторыі.
«Паважаны Мікалай Лукашэнка, мы, школьнікі СШ № 33, просім вас як уплывовага школьніка і будучага прэзідэнта абавязаць магілёўскіх кіраўнікоў выканаць свае абавязкі ў забеспячэнні дзіцячай бяспекі пры наведванні школы і карыстанні спортпляцоўкамі», — гаворыцца ў лісце школьнікаў.
Як паведаміў ініцыятар збору подпісаў сярод вучняў грамадскі актывіст Аляксей Паўлоўскі, звярнуцца да сына Лукашэнкі прымусіла абыякавае стаўленне магілёўскіх чыноўнікаў, адказных за бяспеку дзяцей на тэрыторыі школы.
У сваім лісце да Мікалая Лукашэнкі вучні просяць, каб магілёўскія чыноўнікі забяспечылі асфальтаванне ўваходу на тэрыторыю школы, «бо там з бетону тырчыць друз і каля ўваходу ўтвараюцца лужыны», а таксама прысыпку жвірам месцаў устаноўкі лавак на школьным стадыёне і рамонт агароджы спортпляцоўкі ў мікрараёне «Тэхнапрыбор».
Раней, 9 верасня, адказ на падобную просьбу адносна асфальтавання ўваходу на тэрыторыю школы з боку завода «Электрарухавік» і падсыпкі жвірам месцаў устаноўкі лавак на стадыёне ўстановы Паўлоўскаму даваў кіраўнік Ленінскага раёна Лаўрыновіч.
«На гэтыя віды работ бюджэтам горада фінансаванне не прадугледжана. Сіламі ўстановы адукацыі ўказаныя работы правесці немагчыма з прычыны вялікіх матэрыяльных затрат. Аддзелам адукацыі, спорту і турызму гэтыя віды работ уключаны ў план бягучага і капітальнага рамонту на 2015 год і будуць выкананы пры ўмове фінансавання», — паведамляе чыноўнік.
Паводле слоў Паўлоўскага, збор подпісаў вучняў ажыццяўляў толькі са згоды прысутных побач бацькоў школьнікаў.
23‑гадовы рэпер з Астраўца загінуў за Расію на вайне. Паваяваў ён, відаць, каля месяца17
Каментары