Паліцыя Атавы расследуе прынамсі тры інцыдэнты са стралянінай, якія мелі месца ў сераду раніцай у цэнтры канадскай сталіцы.
Каля 10 раніцы паводле мясцовага часу (17:00 па Мінску) невядомы ўсчаў страляніну каля Нацыянальнага ваеннага мемарыяла ў сталіцы Канады Атаве, размешчанага непадалёк ад парламента краіны, а затым забег у будынак парламента і зрабіў некалькі стрэлаў.
Паводле відавочцы, узброены мужчына адкрыў агонь па вайскоўцах, якія стаялі на варце каля ваеннага мемарыяла.
У ходзе страляніны ля мемарыяла быў паранены адзін вайсковец. Ён пазней памёр ад ран, напісаў у Twitter міністр занятасці Канады Джэйсан Кені.
Кені паведаміў таксама, што быў паранены адзін супрацоўнік службы аховы парламента.
Паступаюць паведамленні і пра трэці інцыдэнт са стральбой — у гандлёвым цэнтры «Рыда» ў цэнтральнай частцы Атавы.
Як перадае канадская тэлекампанія Сі-бі-эс, той, хто страляў ўнутры парламента, быў забіты.
Прадстаўнік паліцыі пацвердзіў Сі-бі-эс, што ўлады лічаць, што ў гэтых інцыдэнтах, удзельнічалі некалькі чалавек, і вядуць пошук іншых падазраваных.
Прэм'ер-міністра эвакуявалі
Будынак парламента і прылеглы раён заблакаваныя сіламі бяспекі.
Прэм'ер-міністр краіны Стывен Харпер пакінуў парламенцкі комплекс і знаходзіцца ў бяспецы, паведамляе канадскае тэлебачанне са спасылкай на атачэнне прэм'ера.
Паліцыя Атавы папярэджвае, што ў раёне парламента магло быць двое ці трое ўзброеных нападнікаў.
Раней карэспандэнт канадскай тэлекампаніі Сі-бі-эс паведаміў, паліцыя вядзе пагоню яшчэ за двума падазраванымі ў раёне Парламенцкага ўзгорка.
Пагроза сярэдняга ўзроўню
Канадскія ўлады абвясцілі, што ўсе вайсковыя базы на тэрыторыі краіны закрыты для наведвання староннімі асобамі, а вайскоўцам рэкамендавана не пакідаць іх тэрыторыю.
Раней у сераду ўлады Канады перагледзелі ўзровень тэрарыстычнай пагрозы ў краіне, змяніўшы яго з «нізкага» на «сярэдні».
У аўторак канадская паліцыя абвясціла, што чалавек, які збіў машынай двух вайскоўцаў, да гэтага знаходзіўся пад наглядам службаў бяспекі па падазрэнні ў сувязях з баевікамі-ісламістамі.
Нападнік быў застрэлены.
Адзін з двух вайскоўцаў, якія сталі ахвярамі гэтага нападу, памёр вечарам у панядзелак.
Цяпер чытаюць
Лукашэнка загадаў прышчапляць нелюбоў да Польшчы пачынаючы са школы85
Лукашэнка загадаў прышчапляць нелюбоў да Польшчы пачынаючы са школы
«У выніку ён сказаў мне: «Хопіць мяне шантажаваць, я хачу палюбавацца гэтымі дрэвамі». Аксана Колб расказала, пра што размаўляла са Статкевічам на мяжы88
Каментары