Станцыя метро «Слуцкі гасцінец» застанецца. Назва «Каржанеўскага» тэхнічная
У рэдакцыю «Нашай Нівы» звярнуўся чытач Яўген Судзілоўскі, які заўважыў у пастанове Савета міністраў РБ ад 29 кастрычніка 2014 «Аб фінансаванні дзяржаўных праграм і мерапрыемстваў у 2015 годзе» ўзгадку аб станцыі метро «Каржанеўскага».
У плане фінансавання ААТ «Банк развіцця РБ» дзярпраграм пунктам 28 значыцца «Дырэкцыя па будаўніцтву Мінскага метрапалітэна», а рэалізуемая імі праграма называецца «Першы участак трэцяй лініі Мінскага метрапалітэна ад станцыі «Каржанеўскага» да станцыі «Юбілейная».
«Няўжо станцыі метро пераіменавалі явачным парадкам?» – пытаецца Яўген Судзілоўскі. Сапраўды, планы назваць адну з новых станцый метро «Каржанеўскага» былі, але быў прыняты варыянт «Слуцкі гасцінец».
У прэс-службе Мінскага метро кажуць, што «станцыі метро «Каржанеўскага» ў нас няма. Нідзе такога не праходзіць».
Давялося звяртацца да намесніка галоўнага інжынера «Дырэкцыі па будаўніцтву Мінскага метрапалітэна» Дзяніса Забалотнага, ён і растлумачыў, у чым рэч.
«Гэта рабочая назва. Яна існавала яшчэ на стадыі абгрунтавання інвеставання праекта, так зацвярджалася. Таму мы не рабілі ніяк зменаў. Правільныя назвы метро сёння пазначаныя на схемах у вагонах. А назва «Каржанеўскага» праходзіць па дакументацыі як рабочая», — сказаў сп.Забалотны.
Не трэба хвалявацца, прыгожыя беларускія назвы трэцяй лініі Мінскага метро нікуды не дзеліся. Будзе і «Слуцкі гасцінец», і «Немаршанскі сад», і «Кавальская Слабада».
Цяпер чытаюць
Ездзілі шукаць нават у БССР, а неапазнанае цела 30 гадоў ляжала ў спецсховішчы. Новыя дэталі загадкавага знікнення ў ЗША беларускага пісьменніка Міколы Цэлеша22
Каментары