У «МТБанка» змяніліся ўласнікі

У беларускага «МТБанка» змяніўся склад акцыянераў.

Як паведамілі ў банку, завяршылася здзелка па набыцці 100% акцый холдынгавай кампаніі MTB Investments (Кіпр), якой, у сваю чаргу, належыць 98,97% акцый ЗАТ «МТБанк». Канчатковымі бенефіцыярнымі ўласнікамі банка сталі беларускі бізнесмен Аляксей Алексін і Ірына Алексіна.

Акцыі набытыя ў ранейшых бенефіцыярных уласнікаў — структур беларускай інвестыцыйнай кампаніі «Зубр Капітал», заснаванай акцыянерамі міжнароднага аўтамабільнага холдынга «Атлант-М», і амерыканскага інвестыцыйнага фонду Horizon Capital. 

Як заявіў старшыня праўлення ЗАТ «МТБанк» Андрэй Жышкевіч, прыход новага акцыянера дазволіць банку «пераадолець аб'ектыўныя абмежаванні ранейшага перыяду развіцця, калі далейшы арганічны рост банка пачаў стрымлівацца памерам існуючага капіталу, а капітал рос толькі за кошт самакапіталізацыі. Не менш прыемна, што новым акцыянерам стаў беларускі бізнесмен, што дазваляе «МТБанку» захаваць свой цяперашні статус найбуйнейшага прыватнага банка, які кантралюецца менавіта нацыянальным інвестарам».

У сваю чаргу новыя акцыянеры адзначылі наступнае: «Набыццё «МТБанка» з'яўляецца важным крокам па дыверсіфікацыі бізнесу, які на сёння прадстаўлены ў Беларусі ў галінах нафтаперапрацоўкі, сельскай гаспадаркі, будаўнічай галіны. Пры ацэнцы банка асаблівая ўвага надавалася наяўнасцю дакладнай і збалансаванай стратэгіі развіцця».

«Арыентацыя «МТБанка» на абслугоўванне беларускага малога і сярэдняга бізнесу і фізічных асоб даказала сваю эфектыўнасць і безумоўна захаваецца. У цэлым мы плануем забяспечыць максімальную пераемнасць існуючай бізнес-мадэлі і захаваць і пашырыць супрацоўніцтва з усімі цяперашнімі і будучымі партнёрамі «МТБанка», — зазначылі новыя акцыянеры.

Першымі крокамі стануць павелічэнне статутнага фонду банка на 15 млрд. рублёў, правядзенне ў найбліжэйшы час маштабнай акцыі для кліентаў — фізічных асоб.

Андрэй Жышкевіч выказаў падзяку ранейшым акцыянерам банка. Холдынг «Атлант-М» набыў «МТБанк» у 2001 годзе. З таго моманту актывы банка павялічыліся ў дзясяткі разоў. Кліентамі банка сталі многія беларускія кампаніі малога і сярэдняга бізнесу. У сваю чаргу з прыходам Horizon Capital прыкметна актывізавалася супрацоўніцтва з міжнароднымі фінансавымі арганізацыямі — было прыцягнута больш за 80 млн. долараў ад такіх арганізацый, як EBRD, IFC, FMO.

• 0
• 0
• 0
• 0
• 0
• 0
• 0
• 0