Апошні месяц зімы не апраўдае сваёй назвы: будзе мала сьнегу і мала маразоў.
У Беларусi першая палавiна лютага, паводле папярэднiх прагнозаў сiноптыкаў, чакаецца больш цёплая, чым звычайна, а другая халаднейшая.
Аб гэтым паведамiла карэспандэнту БЕЛТА начальнiк аддзела метэаралагiчных прагнозаў Рэспублiканскага гiдраметэацэнтра Людмiла Парашчук.
Паводле яе слоў, тэмпература паветра ў цэлым за люты будзе на 1—2 градусы вышэйшая, у асноўным за кошт першай палавiны месяца.
Калi для першых дзён лютага норма — 6‑7 градусаў марозу, то фактычна ў першыя чыслы месяца яна была блiзкая да нуля.
Такое надвор’е фармiруюць заходнiя вятры, якiя ўстойлiва выносяць з Атлантычнага акiяна цёплае паветра. Не чакаецца рэзкiх змяненняў у характары надвор’я i на гэтым тыднi. Па‑ранейшаму Атлантыка будзе адпраўляць на ўсход цыкланiчныя вiхры, якiя будуць перашкаджаць пранiкненню ў паўднёвыя шыроты холаду Арктыкi.
У сераду чакаюцца невялiкiя ападкi ў выглядзе дажджу. Тэмпература паветра 1—7 цяпла. У чацвер i пятнiцу пад уплывам атмасферных франтоў пройдуць ападкi ў выглядзе мокрага снегу i дажджу. Тэмпература паветра ў ноч на 7 лютага будзе вагацца ад мiнус 3 да плюс 3 градусаў, удзень — 0 — плюс 5 градусаў, 8 лютага на працягу сутак каля нуля.
Уначы 9 лютага тэмпература паветра складзе ад нуля да мiнус 6 градусаў, днём будзе ад мiнус 2 да плюс 3 градусаў. Тэмпература паветра 10 лютага яшчэ крыху панiзiцца. Уначы будзе ад 2 да 8 градусаў марозу, днём — ад мiнус 3 да плюс 3 градусаў. Атмасферны цiск будзе вагацца, але рэзкiх перападаў не чакаецца.
Студзень, паводле ацэнкi спецыялiстаў Гiдраметэацэнтра, быў таксама на 3—5 градусаў цяплейшы, чым звычайна. Колькасць ападкаў была блiзкая да нормы. Толькi па захадзе Гродзенскай i Брэсцкай абласцей iх колькасць у 1‑2 разы перавышала месячную норму.
Каментары