Стаў вядомы пералік спэцыяльнасьцяў, пры паступленьні на якія да абітурыентаў будуць прад’яўляцца «асаблівыя патрабаваньні». Спачатку меркавалася, што адбор маючых права паступаць на юрыста, дыплямата ці журналіста будуць ажыцьцяўляць аддзелы ідэалёгіі і БРСМ на месцах, але ўнівэрсытэцкаму лобі ўдалося пакуль перанесьці адбор на ўзровень ВНУ.
Нагадаем, 8 лютага прэзідэнт падпісаў указ аб змяненнях у правілы прыёму ў вышэйшыя і сярэднія спецыяльныя навучальныя ўстановы Беларусі. Тэкст дакумента абнародаваны на Нацыянальным прававым інтэрнет‑партале.
Як вынікае з указа, да спецыяльнасцей, якія трапляюць пад «асаблівыя патрабаванні», адносяцца: «дзяржаўнае кіраванне», «дзяржаўнае кіраванне і права», «міжнародныя адносіны», «міжнароднае права», «правазнаўства», «журналістыка», «міжнародная журналістыка», «мытная справа» і некаторыя іншыя. Парадак прафесійна‑псіхалагічнага сумоўя або тэставання ўстанаўлівае Міністэрства адукацыі.
Старшыня камісіі па адукацыі, культуры, навуцы і навукова‑тэхнічным прагрэсе палаты прадстаўнікоў нацыянальнага сходу Уладзімір Здановіч ставіцца да новаўвядзенняў станоўча. Больш таго, у інтэрв'ю БелаПАН ён выказаў меркаванне аб «мэтазгоднасці пашырэння пераліку такіх спецыяльнасцей». Як лічыць дэпутат, прафесійна‑псіхалагічныя тэсты павінны праходзіць усе абітурыенты, якія ў будучыні будуць працаваць з людзьмі.
У. Здановіч нагадаў, што, згодна з праектам указа, будучыя журналісты і кіраўнікі перад паступленнем павінны былі браць рэкамендацыі ў органах мясцовай выканаўчай улады. Аднак у канчатковы тэкст дакумента гэтае палажэнне не ўвайшло. «Такім рашэннем мы маглі спарадзіць карупцыю ў гэтай сферы. Акрамя таго, рашэнне аб прафпрыгоднасці абітурыента ўсё‑такі павінна прымацца спецыялістамі ў ВНУ», — сказаў кіраўнік камісіі.
Каментары