Увечары ў пятніцу, 2 кастрычніка, у Парыжы завяршылася сустрэча «нармандскай чацвёркі» па Украіне. Перамовы працягваліся каля пяці гадзін. Пасля іх завяршэння картэжы прэзідэнтаў Расіі і Украіны пакінулі Елісейскі палац, а канцлер Германіі і прэзідэнт Францыі засталіся для размовы з журналістамі.
Франсуа Алянд заявіў, што кіраўнікі МЗС Францыі, Расіі, Украіны і Германіі сустрэнуцца для ацэнкі прагрэсу, дасягнутага пры выкананні мінскіх дамоўленасцей, у пачатку лістапада. Пры гэтым Алянд адзначыў, што рэжым спынення агню на ўсходзе Украіны ў цэлым выконваецца. Ён указаў, што мінскія пагаднення павінны быць рэалізаваны, як і прадугледжвалася пры іх заключэнні, да канца 2015 года. Разам з тым ён адзначыў, што іх выкананне будзе працягнута і пасля 31 снежня.
Алянд таксама падкрэсліў, што мясцовыя выбары ў самаабвешчаных рэспубліках ДНР і ЛНР варта перанесці. На яго думку, іх можна будзе правесці толькі пасля прыняцця ва Украіне спецыяльнага закона аб выбарах.
Новы закон неабходна абмеркаваць у рамках рабочай групы, указаў прэзідэнт Францыі. Ён заклікаў самаабвешчанае кіраўніцтва непрызнаных ДНР і ЛНР адмовіцца ад намечаных выбараў, якія не адпавядаюць законам Украіны. Новыя выбары, падкрэсліў ён, павінны цалкам адпавядаць крытэрам АБСЕ. Усім кандыдатам, паводле яго слоў, будзе прадастаўлены імунітэт на час выбараў.
Каментары