У Гомелі да 15 гадоў пазбаўлення волі прыгавораны грамадзянін РФ, жыхар Масквы 1958 года нараджэння.
Як паведамляе Гомельскі абласны суд, ён прызнаны вінаватым у забойстве з асаблівай жорсткасцю (п. 6 ч. 2 арт. 139 КК), а таксама ў наўмысным знішчэнні і пашкоджанні маёмасці, учыненымі агульнанебяспечным спосабам, якія пацягнулі прычыненне шкоды ў асабліва буйным памеры (ч. 3 арт. 218 КК). Пастанова суда можа быць абскарджаная і апратэставаная.
З абвінавачванага на карысць пацярпелай у якасці пакрыцця матэрыяльнага ўрону спагнана больш за 290 млн рублёў і грашовая кампенсацыя маральнага ўрону на 50 млн рублёў. На карысць другога пацярпелага спагнана кампенсацыя за матэрыяльны ўрон у памеры больш як 280 млн рублёў.
Забойства здарылася ў снежні 2014 года. Ратавальнікі, якія прыбылі па выкліку на пажар, знайшлі ў згарэлым гаражы труп мясцовага жыхара. Пасля следчыя выявілі ў гаражы нож з астаткамі крыві. Па падазрэнні ў забойстве быў затрыманы расіянін.
Летась сямейная пара масквічоў вырашыла адрамантаваць свой пазадарожнік «Міцубісі-Паджэра» ў Петрыкаве ў сваякоў жонкі загінулага. Джып размясцілі ў гаражы знаёмага, а праз некалькі месяцаў масквіч прыехаў у Петрыкаў разам са сваім знаёмым, каб заняцца рамонтам. 9 снежня падчас распіцця спіртнога паміж расіянамі ўзнікла сварка, якая завяршылася бойкай і панажоўшчынай. Абвінавачваны нанёс ахвяры дзевяць нажавых раненняў у вобласць грудной клеткі, ад атрыманых ран 49-гадовы мужчына памёр на месцы. Каб замесці сляды, забойца падпаліў гараж.
Пажар знішчыў двухпавярховы гараж і ўсё, што знаходзілася ў ім: дакументы, мэблю, бытавую тэхніку, інструменты, аўтамабіль і асабістыя рэчы пацярпелага. Агульная сума ўрону склала 450 млн рублёў.
Цяпер чытаюць
Арыштаваны чыноўнік, які мог стаць наступным міністрам аховы здароўя10
Каментары