U Homieli da 15 hadoŭ pazbaŭleńnia voli pryhavorany hramadzianin RF, žychar Maskvy 1958 hoda naradžeńnia.
Jak paviedamlaje Homielski abłasny sud, jon pryznany vinavatym u zabojstvie z asablivaj žorstkaściu (p. 6 č. 2 art. 139 KK), a taksama ŭ naŭmysnym źniščeńni i paškodžańni majomaści, učynienymi ahulnaniebiaśpiečnym sposabam, jakija paciahnuli pryčynieńnie škody ŭ asabliva bujnym pamiery (č. 3 art. 218 KK). Pastanova suda moža być abskardžanaja i apratestavanaja.
Z abvinavačvanaha na karyść paciarpiełaj u jakaści pakryćcia materyjalnaha ŭronu spahnana bolš za 290 młn rubloŭ i hrašovaja kampiensacyja maralnaha ŭronu na 50 młn rubloŭ. Na karyść druhoha paciarpiełaha spahnana kampiensacyja za materyjalny ŭron u pamiery bolš jak 280 młn rubloŭ.
Zabojstva zdaryłasia ŭ śniežni 2014 hoda. Ratavalniki, jakija prybyli pa vykliku na pažar, znajšli ŭ zharełym haražy trup miascovaha žychara. Paśla śledčyja vyjavili ŭ haražy nož z astatkami kryvi. Pa padazreńni ŭ zabojstvie byŭ zatrymany rasijanin.
Letaś siamiejnaja para maskvičoŭ vyrašyła adramantavać svoj pazadarožnik «Micubisi-Padžera» ŭ Pietrykavie ŭ svajakoŭ žonki zahinułaha. Džyp raźmiaścili ŭ haražy znajomaha, a praź niekalki miesiacaŭ maskvič pryjechaŭ u Pietrykaŭ razam sa svaim znajomym, kab zaniacca ramontam. 9 śniežnia padčas raśpićcia śpirtnoha pamiž rasijanami ŭźnikła svarka, jakaja zaviaršyłasia bojkaj i panažoŭščynaj. Abvinavačvany nanios achviary dzieviać nažavych ranieńniaŭ u vobłaść hrudnoj kletki, ad atrymanych ran 49-hadovy mužčyna pamior na miescy. Kab zamieści ślady, zabojca padpaliŭ haraž.
Pažar źniščyŭ dvuchpaviarchovy haraž i ŭsio, što znachodziłasia ŭ im: dakumienty, meblu, bytavuju techniku, instrumienty, aŭtamabil i asabistyja rečy paciarpiełaha. Ahulnaja suma ŭronu skłała 450 młn rubloŭ.
Kamientary