У адным з раёнаў амерыканскага штата Вірджынія часова прыпынілі працу ўсіх школ праз скандал, які пачаўся вакол урока арабскай каліграфіі.
Па словах мясцовых уладаў, праца школ прыпыненая ў якасці меры засцярогі. Пры гэтым, па іх ацэнках, сур'ёзнай пагрозы бяспецы навучэнцаў няма.
Скандал разгарэўся вакол задання, якое школьнікам далі на ўроку геаграфіі ў адной са школ. Па словах вучняў, выкладчык папрасіў іх скапіяваць у свае сшыткі фразу, напісаную арабскай вяззю — «Няма бога, акрамя Алаха».
Некаторыя навучэнцы адмовіліся выконваць заданне, а іх бацькі паскардзіліся ўладам. На гэтым фоне было вырашана на час закрыць спачатку тую школу, дзе адбыўся інцыдэнт, а затым і астатнія школы раёна.
Пры гэтым і кіраўніцтва школы, і ўлады настойваюць, што адзінай мэтай задання была дэманстрацыя таго, наколькі складаная арабская мова. У будучыні яны паабяцалі захаваць заданне ў праграме, але выбраць для яго фразу без рэлігійнага падтэксту.
Каментары