Дар'я Кастэнка: У смерці Улада Калеснікава вінаватая расійская «Комсомольская правда»
У Расіі 18-гадовы Улад Калеснікаў на днях пакончыў з сабой, бо яго цкавалі і пераследавалі за праўкраінскую пазіцыю. Калеснікаў вёў старонкі ў інтэрнэце, дзе рэзка крытыкаваў расійскую рэальнасць і настроі ў грамадстве.
Хлопец быў ранімы і ўразлівы, як многія падлеткі. Яго бацькі былі ў разводзе і мала займаліся сынам, аддалі на выхаванне бабе з дзедам. А дзед-пуцінец, імаверна, былы КГБіст, стаў хлопца ламаць. Дайшоў да «Комсомольскай правды», каб расказаць пра тое, які ўнук кепскі. Гэта нагадвала спробы адхрысціцца ад сваякоў, «ворагаў народа», у сталінскі час.
У выніку «Комсомолка» апублікавала артыкул, у якім прымітыўна высмейвала Улада — ягоны выгляд, вагу, факты біяграфіі, сцвярджала, што Улад быў «прадметам кпінаў як хлопцаў, так і дзяўчатак». Выбрала для ілюстрацыі самыя непрывабныя фотаздымкі.
«Пікантныя падрабязнасці, так, гніды?! — піша на адрас журналістаў «Комсомолкі» ў сваім фэйсбуку беларуска, зорка тэлеклуба «Што? Дзе? Калі?» Дар'я Кастэнка. — Ведаючы, што гаворка ідзе пра непаўналетняга, «Камсамолка» публікуе сапраўднае прозвішча Улада, называе горад, дзе ён жыве, і навучальную ўстанову. А каб аднакурснікі яшчэ і ведалі аб'ект ганення ў твар, публікуе яго фота. Фота падлетка, 17-гадовага хлопчыка. У інтэрнэце падобным чынам дзейнічаюць толькі тролі, ольгінская бязмозгая батва па трыццаць тысяч за пучок».
Ганіцелі Улада, журналісты расійскіх СМІ і інтэрнэт-боты, выкарыстоўвалі тыповыя прыёмы расійскіх спецслужбаў: яны распаўсюджвалі чуткі пра тое, што стаў сектантам, што ў яго гомасэксуальныя схільнасці.
«Дарослы дасведчаны чалавек, напэўна, справіўся б з такой сітуацыяй. Але на жаль, юнага хлапчука яна можа раніць да смерці».
«Артыкул — поўны гамон, прачытайце, калі не баіцеся запэцкаць вочы. Аўтара зваць Аляксандр Грышын», — адзначае Кастэнка.
«Як вы думаеце, Аляксандр Грышын адчуў хоць кроплю віны? — пытаецца Кастэнка. — Не. Больш за тое. Ён у сваім твітары і фэйсбуку задаволена, з пачуццем выкананага абавязку напісаў: «Я пра яго пісаў летам, Спрабуючы неяк ўздзейнічаць. Але ўсё дарэмна».
«Сам сабою ён быў нецікавы: набор звычайных штампаў і стэрэатыпаў + уменне іх досыць складна кампіляваць — вось і ўся праграма», — піша пра Калеснікава «Комсомолка» ў цынічным пасмяротным артыкуле.
«З «Камсамолкай» і толькі з «Камсамолкай» пагадзіўся пагаварыць пра ўнука той самы дзед, якога цяпер у фэйсбуку, сацсетках і некаторых СМІ кляймяць прыхільнікі Улада і сам унучок, што знаходзіцца на ўтрыманні бацькі», — пісала газета ў тым сваім першым артыкуле.
«У Грышына вінаватыя ва ўсім лібералы. І ўкраінцы. І амерыканцы». Ён працягвае абліваць хлопца брудам — нават мёртвага, адзначае Кастэнка.
«Каб быць журналістам «Комсомольскай правды», не абавязкова быць разумным або таленавітым. Галоўнае — не мець ніякіх зачаткаў маральнасці», — рэзка падсумоўвае Кастэнка.
Цяпер чытаюць
«Міс Беларусь» усё больш нагадвае конкурс прыгажосці ў гарэме11
Каментары