22 красавіка адбылася сустрэча пасла Беларусі ў Вільні Уладзіміра Дражына з сакратаром літоўскага МЗС.
«Пасол У.Дражын перадаў прабачэнні Беларусі за інцыдэнт, які адбыўся ў Мінску 25 сакавіка, калі беспадстаўна і з прымяненнем фізічнай сілы былі затрыманы журналісты службы навінаў Літоўскага радыё і тэлебачання, якія мелі акрэдытацыю Міністэрства замежных спраў Беларусі», — гаворыцца ў паведамленні прэс‑службы.
Карэспандэнт Літоўскага радыё і тэлебачання Рута Рыбагаўскене і аператар Ёнас Грышконіс былі затрыманы падчас дэманстрацыі з нагоды Дня волі. Літоўскіх журналістаў пратрымалі ва УУС Цэнтральнага раёна Мінска каля дзвюх гадзін і адпусцілі пасля высвятлення асобаў. У іх была канфіскавана відэакасета з адзнятым матэрыялам.
26 сакавіка ў МЗС Літвы быў выкліканы беларускі пасол Уладзімір Дражын. Яму ўручана нота з просьбай правесці дэталёвае расследаванне здарэння, даць тлумачэнні і вярнуць канфіскаваную відэаплёнку. Кіраўніцтва LTR таксама накіравала ў беларускае пасольства ліст з просьбай высветліць прычыны інцыдэнту, вярнуць канфіскаваную відэакасету і кампенсаваць урон за сапсаваную відэакамеру.
Каментары