Паводле расейскага выданьня, беларускі ўрад адобрыў набыцьцё турэцкай кампаніяй 80% акцый дзяржаўнага сотавага апэратара БеСТ. Сума ўгоды ацэньваецца ў $100 млн.
Пра ўгоду «Ъ» паведаміў са спасылкай на агенцтва «Прайм‑ТАСС».
Тое ў сваю чаргу спасылаецца на крыніцу, блізкую да беларускага ўраду. Паводле гэтай крыніцы, падпісаньне дамовы аб продажы 80% акцый БеСТ адбудзецца да канца году. Сума ўгоды афіцыйна не агучваецца.
Аднак, паводле аналітыка iKS‑Consulting Максіма Саваціна, рыначная цана аднаго абанэнта ў краінах СНД складае $400‑500. Таму, з улікам колькасьці абанэнтаў дзяржаўнага апэратара (каля180 тыс.), кошт БеСТу не павінен перавышаць $100 млн. Нагадаем, што год таму Аляксандар Лукашэнка паведаміў пра прапановы па набыцьці БеСТ за $500 млн. Што праўда, патэнцыйныя пакупнікі не былі названыя.
Па інфармацыі «Коммерсанта», на кантрольны пакет акцый беларускага апэратара прэтэндаваў расейскі «Вымпелком». Гэтая кампанія прэтэндавала таксама на набыцьцё «Velcom». Пасьля прыходу ў Беларусь турэцкага «Turkcell», беларускія пляны «Вымпелкому» робяцца мала выканальнымі, мяркуе М.Савацін. І ўсё ж расейцы павялічаць сваю прысутнасьць на рынку мабільнай сувязі Беларусі: расейскай кампаніі Altimo, якая зьяўляецца адным з акцыянэраў “Вымпелкома”, належыць 27,02% акцый “Turkcell”.
Варта адзначыць, што на мінулым тыдні Мінсувязі паведаміла пра самастойныя пляны БеСТу.
Міністар сувязі і інфарматызацыі Мікалай Панцялей у прыватнасьці адзначыў:
«На сёньня «БеСТ» выконвае сваю інвэстыцыйную праграму і да чэрвеня 2008 г. павінен мець 1.130 базавых станцый ва ўласнай сетцы. Пад дадзены аб’ём староньні інвэстар апэратару сотавай сувязі не патрэбны».
Цяпер чытаюць
Сталі вядомыя новыя дэталі ў маштабнай справе арганізатараў канцэртаў4
Каментары