3 траўня ў Нясвіжы ў актавай залі Педагагічнага каледжа перад студэнтамі і ўсімі зацікаўленымі выступяць бард Зміцер Бартосік з новым альбомам «Дарога на Вільню» і пісьменніца Вольга Іпатава, якая падчас сустрэчы прэзентуе кнігу, укладальніцай якой з’яўляецца, — «Мы стваралі сваю Беларусь» Вольгі Грыцук. Гэта кніга распавядае пра лёс аднаго з лідэраў паваеннай эміграцыі ў Канадзе Аляксея Грыцука.
Пачатак сустрэчы а 15 гадзіне.
4 траўня ў Слоніме адбудзецца вечарына памяці Васіля Супруна, ініцыятара заснавання і кіраўніка беларускага патрыятычнага маладзёвага антысавецкага падполля ў 1946—1947 гг. на тэрыторыі Заходняй Беларусі, паэта, краязнаўца, археолага.
Васіль Супрун быў сябрам Саюза пісьменнікаў Беларусі з 1995 г. На гадавіну памяці прыедуць краязнаўцы, археолагі, сябры і паплечнікі. З Гародні запрошаны Аляксей Пяткевіч і Аляксандр Талерчык, краязнаўцы, якія супрацоўнічалі шмат год з В. Супруном. Таксама адбудзецца прэзентацыя кнігі, якая днямі выдадзена ў Гародні, пра жыццё і дзейнасць гэтага мужнага чалавека.
Вечарына памяці адбудзецца ў Слонімскай бібліятэцы а 14 гадзіне.
Каментары