БМВ з бчб-сцяжком спынілі супрацоўнікі ДАІ ў Мінску — і аштрафавалі за неналежнае танаванне шкла
У сераду, 29 чэрвеня, увечары ў раёне праспекта Машэрава ў Мінску ўвагу супрацоўнікаў ДАІ прыцягнуў BMW X5 з арнаментам і бчб-сцягам на даху аўто.
Паводле кіроўцы Цімафея, інспектары спынілі яго і выказалі прэтэнзію да бчб-сцяжка, маўляў «што за сімволіка?». Цімафей кажа, што вельмі спакойна стаў тлумачыць свае адносіны да колераў гістарычнага сцяга, што шануе нацыянальныя традыцыі і паказаў, что нават нанёс на кузаў аўтамабіля нацыянальны арнамент.
Супрацоўнікі ДАІ з цікаўнасцю выслухалі кіроўцу, але вырашылі звязацца з начальствам і ўзгадніць свае дзеянні.
Паводле кіроўцы, ім быццам бы сказалі: не чапаць, але без штрафу не адпускаць.
Урэшце, штраф выпісалі, але мінімальны – 0,3 базавай, або 63 тыс. рублёў — за самастойна зробленую таніроўку шкла.
Карэспандэнту «НН», які стаў сведкам складання пратакола, кіроўца распавёў, што прызнае і выяўленае парушэнне, і справядлівасць пакарання.
Карэспандэнт «НН» таксама звярнуў увагу, што супрацоўнікі ДАІ былі вельмі ветлівымі і адказвалі па-беларуску.
Тысячы людзей ездзяць з налепкамі «Пагоні» або бел-чырвона-белым сцягам пад шклом, гэта ўспрымаецца спакойна, бо стала масавай з'явай.
А вось спробы некаторых кіроўцаў ездзіць з нацыянальнымі сцягамі на даху сталі прыцягваць увагу ДАІшнікаў.
Цяпер чытаюць
Турэцкі лаўрэат прэміі Чэчкі быў у захапленні ад Беларусі і рэжыму ў ёй. А пасля трапіў на Акрэсціна3
Каментары