Амерыканская піцэрыя «Папа Джонс» у Беларусі заклікае на Еўра заўзець за «нашых» – за зборную Расіі
Сёння грамадскі актывіст Андрэй Кім звярнуў увагу, што ва ўсіх сацыяльных сетках беларускага аддзялення амерыканскай франшызы «Папа Джонс» стаіць прапанова падтрымліваць на Еўра «нашых», гэта значыць зборную Расіі.
Вядома, што такі заклік піцэрыі выклікаў абурэнне карыстальнікаў інтэрнэта. Яны засыпалі акаўнты абуральнымі каментамі. Маўляў, чаму гэта зборная Расіі раптоўна стала «нашымі» ў Беларусі? Чаму піцэрыя лічыць патрэбным самой за заўзятараў вырашаць, хто менавіта «нашы» на гэтым Еўра. Бо ў адсутнасць зборнай Беларусі адны заўзеюць за Германію, іншыя – за Уэльс, трэція – за Францыю.
У рэшце рэшт прадстаўнікам «Папа Джонс» давялося тлумачыць сваю пазіцыю. «Вялікі дзякуй усім за каментары і меркаванні. Піцэрыя Papa John's з'яўляецца франшызай, многія акцыі праходзяць у рамках сусветных падзей. І мы не можам сабе дазволіць не ўдзельнічаць. Заўзей за нашых значыць заўзей за нашых суседзяў, калі б ўдзельнічала Беларусь, заўзелі б за Беларусь. Мы не маем ніякага дачынення да палітыкі. Гэтак жа, хочам папярэдзіць, што надалей такія каментары будуць блакавацца», — так адрэагавала кампанія.
Каментатары сталі справядліва цікавіцца, а чаму да «нашых суседзяў» тады не аднеслі Польшчу і Украіну, якія таксама былі прадстаўлены на Еўра-2016? «Франшыза купленая ў Расіі, пра палітыку размовы не будзе», — адказалі ў «Папа Джонс». Вельмі дзіўна, што пытанне, ці з’яўляюцца Украіна з Польшчай таксама суседкамі Беларусі, залічваецца да палітыкі.
Па ўсім выглядае, што выбачацца за сваю «акцыю» прадстаўнікі «Папа Джонс» не маюць намеру і не разумеюць, што ж выклікала такое абурэнне карыстальнікаў інтэрнэту.
Андрэй Кім, якога прадстаўнікі «Папа Джонс» забанілі ў сваіх акаўнтах, заклікае ставіць піцэрыі «Папа Джонс» найменшыя адзнакі з магчымых.
«Папа Джонс» – амерыканская сетка грамадскага харчавання, якая спецыялізуецца на піцы, заснаваная ў 1984 годзе. На 2015 год мела прадстаўніцтвы ў 35 краінах свету.
Цяпер чытаюць
Асудзілі мазырскага блогера Union Bell. Хлопец некалькі гадоў хаваўся, але пасля арышту бацькі быў вымушаны звярнуцца ў бальніцу8
Асудзілі мазырскага блогера Union Bell. Хлопец некалькі гадоў хаваўся, але пасля арышту бацькі быў вымушаны звярнуцца ў бальніцу
«Я супраць. Мовы, якія пакінулі пасля сябе каланізатары ў Афрыцы, сталі шляхам да цывілізацыі». Алексіевіч адказала, як ставіцца да адмовы ад рускай мовы ва Украіне8989
Каментары