Уладзімер Навасяд, які быў дэпутатам Вярхоўнага Савету Беларусі 13-га скліканьня і Палаты прадстаўнікоў 2-га скліканьня, атрымаў афіцыйны дыплём доктара філязофіі ў галіне права.
«Я абараняўся ва Ўкраіне, ва ўнівэрсытэце гораду Запарожжа, — распавёў Свабодзе спадар Навасяд. — У нашых суседзяў Балёнская сыстэма, таму фармальна я цяпер доктар філязофіі, але калі пераводзіць на звычайную сыстэму, то гэта хутчэй кандыдацкая дысэртацыя.
Пасьля абароны ў Запарожжы, дзе ніхто з чальцоў навуковай рады ня кінуў мне чорнага шара, давялося трымаць яшчэ адзін іспыт. Рэч у тым, што ва Ўкраіне цяпер шмат што правяраюць на магчымую карупцыйнасьць. Таму давялося паехаць у Кіеў, у Міністэрства адукацыі, і там прайсьці праз спэцыяльную працэдуру праверкі. Усё прайшло добра.
Тэма маёй дысэртацыі тычыцца адміністрацыйнага права. Гэта самакіраваньне і дэцэнтралізацыя ўлады на прыкладах дзьвюх суседніх краін — Беларусі і Ўкраіны.
Навуковая праца зьявілася не на пустым месцы. Ужо чацьвёрты год наша Партыя свабоды і прагрэсу шмат займаецца праблемамі самакіраваньня. Гэта нашая ніша, нашая дзялянка. Мы працуем непасрэдна з таварыствамі ўласьнікаў, з каапэратывамі, якія знаходзяцца на самаабслугоўваньні. У нас агульная мэта — эфэктыўнае кіраваньне дамамі. Хочам паказаць, што дэмакратыя, калі людзі самі, без дазволаў улады, распараджаюцца сваімі фінансамі, ёсьць непасрэдная выгада для людзей. Гэта, бадай, адзіная ніша ў Беларусі, дзе яшчэ можна казаць пра рэальнае самакіраваньне.
Мы праводзім сэмінары, трэнінгі. Толькі летась празь іх прайшлі 1970 чалавек. Прычым на правядзеньне вучобы мы ня просім спонсарскіх грошай. Наадварот, людзі самі плацяць — 200 рублёў за тры дні навучаньня. Але тое, што людзі пагаджаюцца даваць уласныя грошы за веды, сьведчыць, што мы сапраўды вучым іх карысным рэчам. Прычым ладзім сэмінары па ўсёй Беларусі. Так, я летась 75 дзён правёў за межамі Менску на нашых курсах».
Партыя свабоды і прагрэсу, якую ўзначальвае Ўладзімер Навасяд, дагэтуль афіцыйна не зарэгістравана. Спадар Навасяд спадзяецца, што сытуацыя зьменіцца да лепшага:«Увесну будзем праводзіць чарговы зьезд аргкамітэту. Пасьля зноў панясём дакумэнты на рэгістрацыю. Першыя чатыры спробы былі няўдалымі».
Цяпер чытаюць
Затрымалі кіраўнікоў івэнт-кампаній. Адзін з іх дапамагаў ладзіць канцэрты ў падтрымку Лукашэнкі1
Затрымалі кіраўнікоў івэнт-кампаній. Адзін з іх дапамагаў ладзіць канцэрты ў падтрымку Лукашэнкі
«На канцэртах няма месца радыкальнаму нацыяналізму, агрэсіі і гвалту». Макс Корж выказаўся наконт скандалу, які разгарэўся пасля яго выступу ў Варшаве3737
Каментары