РУП «Белмытнясэрвіс» абверг апублікаваныя РБК абвінавачванні ва ўвозе на тэрыторыю Расіі санкцыйнай прадукцыі. У паведамленні, апублікаваным на сайце кампаніі, паведамляецца, што ў 2017 годзе кампанія ўвозіла і афармляла на тэрыторыі Беларусі плодаагароднінную прадукцыю з Афрыкі, Азіі і Паўднёвай Амерыкі, у дачыненні да якой Расія не ўводзіла санкцыі, піша Tut.by.
«На падставе заключаных дагавораў з расійскімі суб'ектамі гаспадарання, якія ажыццяўляюць знешнеэканамічную дзейнасць на працягу пяці гадоў і больш, прадпрыемства ажыццяўляла пастаўкі плодаагародніннай прадукцыі ў Расійскую Федэрацыю.
Пастаўкі ажыццяўляліся ў адпаведнасці з мытным заканадаўствам, а таксама з забеспячэннем патрабаванняў бяспекі ў галіне каранціну раслін», — запэўнілі на прадпрыемстве.
У паведамленні адзначана, што гародніна і садавіна належаць да прадукцыі высокай фітасанітарнай рызыкі і суправаджаюцца сертыфікатамі, якія выдаюцца фітасанітарнымі службамі краін адпраўлення. Пры гэтым фітасанітарныя сертыфікаты абавязкова ўтрымліваюць звесткі аб краіне паходжання тавараў.
«Пры ўвозе на тэрыторыю Расійскай Федэрацыі тавар праходзіць праверку на стацыянарных пастах Рассельгаснагляду, дзе расійскія атрымальнікі прадастаўляюць упаўнаважаным службам неабходную інфармацыю, у тым ліку аб краіне паходжання тавару. Адпаведна, дадзеныя службы ў кожным выпадку маюць магчымасць праверыць сапраўднасць названых звестак. Такая праверка часцяком доўжыцца некалькі дзён», — растлумачылі у «Белмытсэрвісе».
І толькі пасля выдачы расійскім упаўнаважаным органам акта другаснага фітасанітарнага кантролю тавар можа быць уцягнуты ў законны абарот на тэрыторыі РФ. Копіі такіх дакументаў расійскія партнёры накіроўваюць у «Белмытнясэрвіс», што сведчыць аб адсутнасці прэтэнзій да рэалізаваных на тэрыторыі Расіі тавараў.
Расійскія СМІ паведамлялі, што Федэральная мытная служба Расіі раскрыла найбуйнейшую сетку пастаўшчыкоў санкцыйнай прадукцыі з 29 кампаній, зарэгістраваных у перыяд з 2014 года, а заснавальнікамі ў асноўным з'яўляюцца грамадзяне Беларусі. Інфармацыя апублікаваная са спасылкай на крыніцы, «блізкія да ФМС».
Цяпер чытаюць
«Паўстання такіх памераў у Беларусі ніколі не было». Гісторык расказаў, чым унікальны 2020-ты і што мы возьмем з яго на будучыню7
Каментары