Сёння ў 9 гадзін суд Маскоўскага раёна Мінска прыняў рашэнне па скарзе адвакаткі Ганны Бахціной, якую Мінюст нядаўна пазбавіў ліцэнзіі. У задавальненні скаргі — адмоўлена.
Пастанова аб пазбаўленні Бахціной ліцэнзіі была вынесеная Міністэрствам юстыцыі 14 верасня на падставе рашэння кваліфікацыйнай камісіі. Але пры гэтым, на думку Бахціной, мелі месца парушэнні пры правядзенні атэстацыі, а пазачарговая атэстацыя была праведзена няправільна, таму і рашэнне было прынятае неабгрунтавана.
30 кастрычніка, падчас разгляду скаргі, Ганна Бахціна падрабязна давяла суду, што менавіта паслужыла падставай для прыняцця рашэння каваліфікацыйнай камісіяй аб пазбаўленні яе адвакацкай ліцэнзіі. Аб гэтым напісала ў фэйсбуку праваабаронца Эніра Браніцкая, якая прысутнічала на судовым пасяджэнні:
«Бахціна дакладна расклала, што на падставе двух парушэнняў па справаводстве (афармленне дагавора з кліентам) і таго, што яна не адказала на юрыдычнае пытанне камісіі, яе пазбаўляюць ліцэнзіі і кажуць, што гэта падставы таго, што яна не можа прафесійна выконваць свае абавязкі. І зроблена гэта было Мінюстам без законных падстаў і ўсялякай публічнай матывацыі. Ганна Віктараўна гучна і выразна агучыла, што гэта робіцца па палітычных матывах з-за таго, што яна ўдзельнічае ў абароне па справе «Белага Легіёну», што праверкі пачаліся з Магілёўскай калегіі вясной (з-за тых хто абараняў людзей у Бабруйску і Асіповічах) і скончыліся ў Мінску. Дзяржаве патрэбныя паслухмяныя адвакаты…»
Падчас аднаго з судовых пасяджэнняў таксама высветлілася, што яшчэ 19 кастрычніка, не чакаючы завяршэння суду, Рада Мінскай гарадской калегіі адвакатаў па прадстаўленні Мінюста выключыў Ганну Бахціну з сябраў калегіі. Рашэнне ўступіла ў сілу 26 кастрычніка.
Каментары