Siońnia ŭ 9 hadzin sud Maskoŭskaha rajona Minska pryniaŭ rašeńnie pa skarzie advakatki Hanny Bachcinoj, jakuju Miniust niadaŭna pazbaviŭ licenzii. U zadavalnieńni skarhi — admoŭlena.
Pastanova ab pazbaŭleńni Bachcinoj licenzii była vyniesienaja Ministerstvam justycyi 14 vieraśnia na padstavie rašeńnia kvalifikacyjnaj kamisii. Ale pry hetym, na dumku Bachcinoj, mieli miesca parušeńni pry praviadzieńni atestacyi, a pazačarhovaja atestacyja była praviedziena niapravilna, tamu i rašeńnie było pryniataje nieabhruntavana.
30 kastryčnika, padčas razhladu skarhi, Hanna Bachcina padrabiazna daviała sudu, što mienavita pasłužyła padstavaj dla pryniaćcia rašeńnia kavalifikacyjnaj kamisijaj ab pazbaŭleńni jaje advakackaj licenzii. Ab hetym napisała ŭ fejsbuku pravaabaronca Enira Branickaja, jakaja prysutničała na sudovym pasiadžeńni:
«Bachcina dakładna raskłała, što na padstavie dvuch parušeńniaŭ pa spravavodstvie (afarmleńnie dahavora z klijentam) i taho, što jana nie adkazała na jurydyčnaje pytańnie kamisii, jaje pazbaŭlajuć licenzii i kažuć, što heta padstavy taho, što jana nie moža prafiesijna vykonvać svaje abaviazki. I zroblena heta było Miniustam biez zakonnych padstaŭ i ŭsialakaj publičnaj matyvacyi. Hanna Viktaraŭna hučna i vyrazna ahučyła, što heta robicca pa palityčnych matyvach z-za taho, što jana ŭdzielničaje ŭ abaronie pa spravie «Biełaha Lehijonu», što pravierki pačalisia z Mahiloŭskaj kalehii viasnoj (z-za tych chto abaraniaŭ ludziej u Babrujsku i Asipovičach) i skončylisia ŭ Minsku. Dziaržavie patrebnyja pasłuchmianyja advakaty…»
Padčas adnaho z sudovych pasiadžeńniaŭ taksama vyśvietliłasia, što jašče 19 kastryčnika, nie čakajučy zaviaršeńnia sudu, Rada Minskaj haradskoj kalehii advakataŭ pa pradstaŭleńni Miniusta vyklučyŭ Hannu Bachcinu ź siabraŭ kalehii. Rašeńnie ŭstupiła ŭ siłu 26 kastryčnika.
Kamientary