Прафесар Казлякоў з БДТУ: Улада Беларусі падтрымлівае міфатворчасць нацыяналістаў
Прафесар Уладзімір Казлякоў з БДТУ на сайце расійскага Інстытута краін СНД крытыкуе беларускія ўлады за хаўрусніцтва з нацыяналістамі.
На расійскім імперскім сайце «Матерік» з'явіўся артыкул пад красамоўнай назвай «Міфатворчасць беларускіх нацыяналістаў гатовая падтрымаць ўладу РБ», у якім аўтар, які негатыўна ставіцца да БНР, крытыкуе беларускія ўлады за дазвол святкавання Дня Волі.
Цікава, што аўтарам матэрыяла і крытыкам беларускай улады з'яўляецца доктар гістарычных навук, прафесар кафедры гісторыі Беларусі і паліталогіі Беларускага дзяржаўнага тэхналагічнага ўніверсітэта Уладзімір Казлякоў.
Свой артыкул ён пачаў з крытыкі «свядомых»:
«Абгрунтаванасць і праўдзівасць гістарычных фактаў не вельмі хвалююць беларускіх «нацыянальна свядомых» гісторыкаў і публіцыстаў. Самае галоўнае для іх — распаўсюдзіць выдумкі, накіраваныя супраць савецкай гісторыі, перакруціць ці зганьбаваць памяць нашых бацькоў і дзядоў, адпавядаючы заходнім штампам і ўзорам».
Далей ужо крытыкуецца беларуская ўлада, на якую нібыта ўплываюць «свядомыя»:
«Для маніпуляцыі грамадскай свядомасці выкарыстоўваюцца розныя прыёмы і метады, на якія паддаюцца і беларускія чыноўнікі. І вось адзін з іх на пытанне: «Ці будзе святкаваць 100-годдзе БНР на дзяржаўным узроўні?», «дыпламатычна» адказвае: «Калі гэтае свята неабходны грамадству, то мы будзем рэалізоўваць». Такая «дыпламатычная» абыякавасць вельмі здзіўляе. А якая пазіцыя саміх уладаў? Чакаць аказалася, на жаль, нядоўга. Мінскі гарвыканкам дазволіў апазіцыйным групам (а менавіта яны настойвалі на гэтым свяце) адзначыць 100-я ўгодкі БНР у цэнтры беларускай сталіцы. Каментары залішнія».
Далей прафесар дае сваю ацэнку тым умовам, у якіх стваралася БНР. Ён піша, што БНР, якая стваралася ва ўмовах нямецкай акупацыі, не можа лічыцца дзяржавай, а паводзіны дзеячаў БНР у адносінах да Нямеччыны Казлякоў лічыць «халуйствам» (гэта слова паўтараецца ў тэксце ажно 5 разоў).
Узгадаў чамусьці прафесар у тэксце і пра Украіну:
«Ідэалогія і псіхалогія сучаснага «майдана» сфармавалася яшчэ ў часы Украінскай народнай рэспублікі, дзеячы якой дэманстравалі пячорную русафобію і шчырае «халуйства» перад германскімі акупантамі».
На думку Уладзіміра Казлякова, менавіта БССР выканала дзяржаўную, палітычную, эканамічную і культурную ролю аб'яднання беларускай нацыі.
Цікава, што партал «Матерік», дзе быў апублікаваны гэты артыкул, належыць расійскаму Інстытуту краін СНД, дырэктарам і заснавальнікам якога з'яўляецца адыёзны дэпутат Дзяржаўнай Думы Расіі Канстанцін Затулін.
Затулін, вядомы сваімі імперскімі поглядамі, таксама з'яўляецца намеснікам старшыні камітэта Дзяржаўнай Думы па справах СНД і сувязях з суайчыннікамі. У 2014 годзе Канстанцін Затулін браў актыўны ўдзел у анексіі Крыма.
Цяпер чытаюць
Стала вядома, дзе працуе фаварытка Лукашэнкі Уладлена Зайцава18
Каментары