У пятніцу, 17 жніўня, у рэстаране «Паедзем, паядзім» каля Курапатаў адбылося вяселле. Каля ўрочышча, па словах Змітра Дашкевіча, увечары быў салют. Tut.by даведаўся, што на гэты конт думае адзін з заснавальнікаў рэстарана Леанід Зайдэс.
Лідар «Маладога фронту» Зміцер Дашкевіч зняў, як на тэрыторыі рэстарана «Паедзем, паядзім» на ўсходнім баку танцавала кампанія людзей, а музыка гучала побач з крыжамі, дзе стаяў Дашкевіч.
Увечары актывіст зняў салют паблізу ўрочышча Курапаты. У каментарах Дашкевічу даслалі фотаздымкі з пустымі скрынкамі ад феерверку каля плота рэстарана, з боку дарогі.
Пасля гэтага выпадку ў інтэрнэце з'явілася петыцыя, якая ўжо сабрала больш за 700 подпісаў і якую плануюць накіраваць у Генеральную пракуратуру. У звароце актывісты заклікаюць зладзіць праверку, а таксама выпісаць прадпісанне аб закрыцці рэстарана СТАА «Белрэстіінвест» з-за «неаднаразовых парушэнняў існуючых абцяжаранняў, указаных у адказе генпракуратуры ад 2018/07/13 пад нумарам 0703-446-2012».
Раней у адказе актывісту Антону Матольку Генпракуратура паведамляла, што зямельны ўчастак, дзе знаходзіцца ўстанова, мае абцяжаранні ў выкарыстанні.
— З усходняга боку рэстарана выключаюцца ўсе віды «гучных мерапрыемстваў», арганізацыі адпачынку на адкрытым паветры. Дадзенае абмежаванне датычыцца ўсіх формаў адпачынку ў сувязі з неабходнасцю выключыць парушэнне сакральнага характару гісторыка-культурнай каштоўнасці, якая прымыкае з усходняга боку.
Леанід Зайдес: «На падкантрольнай мне тэрыторыі салюту не было»
Гэтую сітуацыю пракаментаваў адзін з заснавальнікаў рэстарана Леанід Зайдэс.
— Вяселле было, гэтага ніхто не адмаўляе. А салюту не было. Прытым вяселле на дзевяць чалавек, гэта хіба вяселле? Людзі зрабілі заказ, прыйшоў мужчына ў касцюме, нявеста ў белай сукенцы, нават не ў вэлюме. Мне іх што, выгнаць? Яны проста распісаліся. Гэты відэазапіс зроблены не на маёй тэрыторыі. Ёсць мая тэрыторыя, за якую я адказваю. На падкантрольнай мне тэрыторыі салюту не было.
Бізнэсмен кажа, што ў яго ёсць відэазапіс, які гэта пацвярджае.
Зайдэс тлумачыць, што для яго мерапрыемства — гэта калі арандуюць рэстаран, прыязджае картэж, нявеста ў вэлюме, сведкі, музыка. «Але гэтага не было, не адгадалі», — падкрэслівае ён.
— А тое, што адбываецца за межамі тэрыторыі … Ну вы зразумейце правільна. Выклікайце тады міліцыю, я за тую тэрыторыю адказнасці не нясу. А так званае вяселле, напэўна, было. Але яно было без музыкі, без нічога, тэлевізар працаваў. Было дзевяць чалавек. Картэжу і лімузінаў не было.
— Ці мог быць феерверк, напрыклад, каля запраўкі?
— Напэўна, такое быць магло. Я не буду адмаўляць, я там не прысутнічаў.
Зайдэс падкрэсліў, што абцяжаранні ў выкарыстанні тэрыторыі тычацца толькі ўсходняга боку. Гэта бок Курапатаў.
— Калі я зайду з іншага боку — з боку ўваходу, то абцяжаранняў няма. І салют магу там пускаць па логіцы. Ніхто мне нічога не зможа тут сказаць.
Цяпер чытаюць
Дачка суддзі, якая жыўцом згарэла ў судзе ў Слуцку ў 1967-м, расказала, як склалася жыццё іх сям’і пасля гучнай трагедыі7
Каментары