Блогер Лапшын заявіў, што таямніча атрымаў кампрамат супраць Беларусі. Генпракуратура пярэчыць
Расійска-ізраільскі блогер Аляксандр Лапшын стаў вядомы праз cвае прыгоды ў Беларусі, адкуль быў дэпартаваны ў Азербайджан. Цяпер Лапшын паведаміў, што з ім звязаліся ад імя беларускай пракуратуры і перадалі «кампрамат супраць Беларусі».
Чытайце: Блогера Лапшына ў кайданках даставілі спецрэйсам з Мінска ў Баку
«Максім Сяргеевіч Грыгор'еў з міжнароднага аддзела Генеральнай пракуратуры Беларусі, які прадстаўляў інтарэсы Баку ў працэсе аб маёй выдачы ў Азербайджан, на мінулым тыдні напісаў мне з жаночага акаўнта ў фэйсбуку і папрасіў прабачэння. Маўляў, ён толькі выконваў загады зверху. Адразу я вырашыў, што гэта розыгрыш. Ён п'яны? Але ён напісаў, што мае дакумент, які я і мае адвакаты шукалі год і не знайшлі. Я думаў, што маёрышка папросіць грошай, але ён нечакана даслаў мне дакумент у фэйсбук», — паведаміў сваім чытачам Лапшын.
Паводле Лапшына, гэтая папера ўяўляе сабой кампрамат супраць Беларусі (супраць якой ён падаў скаргу за парушэнне правілаў экстрадыцыі ў Раду па правах чалавека ў Жэневе).
«Гаворка пра маю заяву аб дадатковай абароне, якая была пададзена мной 03.02.2017 і на якую ўлады Беларусі былі абавязаныя адрэагаваць у тэрмін, не даўжэй за 15 сутак, паводле закона. Але яны заявілі СМІ, што я ніколі гэтую заяву не падаваў. І вось, Максім Сяргеевіч дасылае мне гэты дакумент», — дадае таксама Лапшын. Ён разважае, што нехта, магчыма, даслаў дакумент ад імя таго пракурора, каб яго «падседзець». Альбо гэта разлік пракурора на будучую эміграцыю нібыта перад палітычнай эміграцыяй.
«Наша Ніва» звярнулася ў Генеральную пракуратуру з просьбай пракаментаваць допіс Лапшына.
Там сцвярджаюць, што ён памыляецца.
«Размешчаны ў сетцы Аляксандрам Лапшыным дакумент свядома інтэрпрэтуецца апошнім няслушна, бо ён [дакумент] з'яўляецца копіяй зварота яго адвакатаў у адміністрацыю СІЗА-1 Мінска і не можа разглядацца як заява асобы аб наданні ёй статусу ўцекача, дадатковай абароны ці прытулку ў Беларусі. У прадастаўленым дакуменце выкладаецца просьба абаронцаў перадаць копію «узора» адпаведнага хадайніцтва Лапшыну, пакольку толькі ён сам, а не яго абаронца, можа запытаць такі прававы статус. Гэты дакумент і не мусіць быць у матэрыялах экстрадыцыйнай вытворчасці. Пры гэтым у Генеральнай пракуратуры Беларусі адсутнічае інфармацыя аб тым, што Лапшын звярнуўся з такім хадайніцтвам.
На момант фактычнай перадачы 7 лютага 2017 года Аляксандра Лапшына прадстаўнікам азербайджанскіх праваахоўных органаў перашкоды для завяршэння працэдуры адсутнічалі.
Паведамленыя Лапшыным у сацыяльных сетках звесткі аб атрыманні інфармацыі ад пракурорскага работніка не адпавядаюць рэчаіснасці», — гаворыцца ў адказе пракуратуры.
Фіналістак конкурсу «Міс Беларусь — 2025» вывелі на сцэну ў касцюмах з цытатамі Лукашэнкі19
Каментары