Следчым камітэтам распачата крымінальная справа паводле артыкула «Давядзенне да самагубства». Пра гэта паведаміла Свабодзе афіцыйны прадстаўнік СК Юлія Ганчарова.
«Дзеля высвятлення ўсіх абставінаў заведзена i расследуецца крымінальная справа паводле часткі 2 артыкула 145 Крымінальнага кодэкса. Сьледчыя дапытваюць сяброў, знаёмых, педагогаў. Чакаюцца вынікі экспертызаў, у тым ліку комплекснай псіхолага-псіхіятрычнай», — адзначыла Юлія Ганчарова.
Цела 16-гадовага Мікіты М. знайшлі павешаным на пажарнай лесвіцы Дома культуры раніцай 4 лютага. Жыхары горада гавораць пра «няшчаснае каханне» і «канфлікты ў гімназіі».
«Людзей насцярожыла, што хлопец павесіўся ў цэнтры горада і што ягоны ўчынак выглядае як помста некаму», — выказалася адна з жыхарак райцэнтра.
Дырэктар гімназіі Людміла Яршова адмаўляецца нешта казаць пра здарэнне. У аддзеле адукацыі Быхаўскага райвыканкама таксама ўстрымаліся ад каментароў, бо «ідзе следства».
Вядома, што гадавалі Мікіту маці і бабуля. Быхаўская раёнка «Маяк Прыдняпроўя» апублікавала спачуванні ім у сувязі з трагічнай смерцю Мікіты ад імя адміністрацыі і педагагічнага калектыву гімназіі, а таксама бацькоўскага камітэта.
За апошнія паўгода гэта другая смерць непаўналетняга ў Быхаўскім раёне. У кастрычніку на ўроку фізкультуры памёр вучань трэцяга класа Лутчыцкай школы. У хлопчыка было хворае сэрца.
Каментары