Брат дзяўчыны, якую злавілі на ўкідзе: «Веру, што выбары могуць фальсіфікаваць, што ўдзельнічала мая сястра — не веру. Буду з ёй пра гэта гаварыць»
Грамадства раз'юшыла нахабная спроба фальсіфікацыі галасавання ў Брэсце: назіральнік Юрый Вашчанчук зняў на відэа, як юнага выгляду лэдзі спрабуе ўкінуць стос бюлетэняў у скрынку.
Чытайце: Назіральнік зняў, як дзяўчына спрабуе закінуць некалькі бюлетэняў у скрыню для галасавання ВІДЭА
Журналісты яе ідэнтыфікавалі — гэта маладая выхавальніца дзіцячага садка Анастасія Кулічкова. Па нейкім супадзенні старшыня ўчастковай выбарчай камісіі — Таццяна Аляксееўна Мосіна — дырэктарка гэтага дзіцячага садка.
Чытайце: Дзяўчыну, што спрабавала ўкінуць пачак бюлетэняў на ўчастку ў Брэсце, здаецца, знайшлі
З самой Анастасіяй Кулічковай звязацца пакуль немагчыма, але «Наша Ніва» пацікавілася ў яе брата Аляксея аб тым, што ён пра ўсё гэта думае.
«Ну хто ведае, што там была за сітуацыя? Я бачыў гэтае відэа: яна прыйшла галасаваць, да яе падбег чалавек, выказаў нейкую прэтэнзію, яна спалохалася і сышла — нармальна, па мойму», — сказаў Аляксей.
Ці дапускае ён магчымасць таго, што выбары ў краіне фальсіфікуюцца?
«Думаю, што гэта магчыма і лёгка. Але я лічу, што мая сястра не магла ўдзельнічаць у такім, я з ёй пакуль пра гэта не гаварыў, але абавязкова буду. Не думаю, што яна магла на нейкія абяцанні павесціся. Чалавека могуць проста падбухторыць, як гэта ў нашай краіне падбухторваюць ісці галасаваць на выбары, менавіта кіраўніцтва — з работы ці штосьці такое», — падсумаваў ён.
Цяпер чытаюць
Ціханоўская — Трампу: Лукашэнку трэба пакараць, а не заахвочваць22
Каментары