Начальнік стаўбцоўскай міліцыі Іван Мамайка: Я заўсёды буду выступаць у парламенце па-беларуску
У кулуарах паседжання Палаты прадстаўнікоў карэспандэнт «Нашай Нівы» пагаварыў з Іванам Мамайкам. Гэта адзін з дэпутатаў новага склікання, якія сталі выступаць па-беларуску.
Цікава, што сваё дэпутацтва Мамайка яшчэ некалькі месяцаў будзе спалучаць з пасадай начальніка стаўбцоўскай міліцыі.
Дык чаму Мамайка вырашыў выступаць па-беларуску?
«Пытанне дзіўнае! Беларус выступае на сваёй мове — што тут такога? Я лічу, што кожны афіцыйны выступ трэба рабіць на сваёй мове. Так, заўсёды буду ў парламенце выступаць па-беларуску», — абяцае міліцыянт.
Пытаемся, як часта гаворыць па-беларуску па месцу службы?
«З улікам таго, што ў нас двухмоўе, сам я гаварыў тады, калі да мяне звярталіся па-беларуску. Калі да мяне звярталіся на другой дзяржаўнай — карыстаўся рускай.
Канечне, часцей звярталіся [па-беларуску] грамадзяне, але бывала, што і супрацоўнікі, і на нейкіх афіцыйных мерапрыемствах.
Сам я скончыў беларускую школу — гэтага мне дастаткова. Раю чытаць па-беларуску больш, тады будзе ўсё добра», — сказаў Мамайка.
Іван Мамайка
Нарадзіўся ў 1974 годзе ў шматдзетнай сялянскай сям'і. Скончыў Брэсцкі дзяржаўны універсітэт па спецыяльнасці «гісторыя і сацыяльна-палітычныя дысцыпліны» (1996) і Магілёўскую школу міліцыі па спецыяльнасці «правазнаўства» (2004). З 1996 года працуе ў міліцыі, з 2014 — начальнік аддзела ўнутраных спраў Стаўбцоўскага райвыканкама.
Цяпер чытаюць
«Вітольд казаў: «Ну што вы, што вы…» А мянты пасля крычалі пра мора крыві». Палітвязень з суседняй камеры расказаў пра смерць Ашурка5
Каментары