Двое абмененых экс-беркутаўцаў вярнуліся ў Кіеў і просяць садзейнічання ў Зяленскага
Экс-«беркутаўцы» Аляксандр Марынчанка і Сяргей Тамтура, якія знаходзіліся пад хатнім арыштам па абвінавачванні ў расстрэлах на Майдане і былі перададзеныя ў «ДНР» у рамках абмену, вярнуліся ў Кіеў, перадае «Украінская праўда».
Адвакат былых байцоў Аляксандр Гарашынскі апублікаваў у Facebook зварот Марынчанкі і Тамтуры да прэзідэнта Уладзіміра Зяленскага, старшыні ВР Дзмітрыя Разумкова і генпракурора Руслана Рабашапкі ад 8 лютага:
«Мы, экс-супрацоўнікі Кіеўскага спецпадраздзялення міліцыі «Беркут» Аляксандр Марынчанка і Сяргей Тамтура, заяўляем сваю пазіцыю ў дачыненні да раней праведзенага абмену і нашага сённяшняга вяртання ў Кіеў».
«Праўда — гэта прычына нашага вяртання ў Кіеў. На працягу пяці гадоў судовы працэс быў асноўнай крыніцай праўды аб Майдане і павінен працягнуцца. Мы будзем удзельнічаць у судовых пасяджэннях.
Нам няма чаго хаваць — мы не рабілі злачынстваў. Мы хочам аднавіць сумленнае імя спецпадраздзялення «Беркут». Мы хочам, каб па-сапраўднаму вінаватыя ў забойствах праваахоўнікаў і пратэстантаў былі пакараныя. Мы заклікаем прэзідэнта Украіны, генеральнага пракурора Украіны і дэпутатаў Вярхоўнай Рады Украіны неадкладна адмяніць закон аб амністыі майданаўцаў і забяспечыць справядлівае і бесстаронняе расследаванне падзей 2014 года пры ўдзеле міжнародных назіральнікаў і экспертаў».
Экс-беркутаўцы адзначаюць, што ў ліпені і снежні 2019 года ім была змененая мера стрымання з утрымання пад вартай на хатні арышт, аднак за кратамі «беспадстаўна» знаходзіліся іх «калегі»: Сяргей Зінчанка, Павел Аброськін і Алег Янішэўскі. Пасля з'явілася магчымасць іх вызвалення ў рамках абмену на ўмовах «усіх на ўсіх».
Марынчанка і Тамтура таксама адзначаюць, што іх адмова ад удзелу ў абмене паставіла б пад пагрозу гэты абмен у цэлым: «Таксама мы разумелі, што гэты абмен дазволіць прыцягнуць увагу ўладаў і грамадскасці да пытання аб'ектыўнай ацэнкі падзеяў 2014 года. Гэта быў дзяржаўны пераварот. А частка пратэстуючых не былі мірнымі — яны былі ўзброенымі злачынцамі. Яны закідвалі праваахоўнікаў камянямі, катавалі, палілі «кактэйлямі Молатава», расстрэльвалі іх з агнястрэльнай зброі!»
Нагадаем, 29 снежня ў рамках абмену Украіна перадала пяцярых экс-беркутаўцаў, абвінавачаных у расстрэлах на Майдане.
Цяпер чытаюць
«Самі хутка здохнуць». Фоты з саміта ў Мінску даюць пабачыць Пуціна і Лукашэнку без грыму, а таксама Колю12
Каментары