У Віцебску раптоўна памёр 25-гадовы грамадзянін Расіі Данііл Лапацюк. Увечары 6 красавіка хлопца прывезлі ў бальніцу, уначы ён памёр.
Данііл — ураджэнец расійскага Омска. У Віцебску ён жыў фактычна сам. Працаваў то тут, то там: кіроўцам таксі, рамонтнікам камп’ютараў, спрабаваў рабіць сайты…
Маці і сястра яго жывуць у Францыі, бацька хлопца, фатограф Сяргей Галавач, жыве ў Расіі. Менавіта бацька апублікаваў эмацыйны пост у сацсетках: маўляў, сын памёр ад пнеўманіі.
Дакладная прычына смерці пакуль невядомая. Афіцыйнае заключэнне будзе выдадзена толькі 8 красавіка, кажуць сябры Данііла.
Бацькі Лапацюка дакладнай інфармацыі таксама не маюць — падрабязнасці паведамляюць ім віцебскія сябры хлопца.
«У яго была астма і слабае здароўе. Магчыма, ён памёр ад прыступа набытага дыябету», — разважае яго сястра Соф'я.
«Наша Ніва» звязалася з адным з сяброў.
«У Данііла была астма. І раптам яму стала вельмі кепска, проста ў адзін момант. Мы адвезлі яго ў бальніцу ўвечары 6 красавіка, — кажа сябар Лапацюка. — Але ці то ўначы, ці то раніцай Данііл памёр у рэанімацыі. Пнеўманія гэта была ці каранавірус — казаць рана. Цела яшчэ не аддалі. Як і калі яго будзем хаваць, пакуль не вырашана.
Але магу сказаць дзве рэчы. Па-першае, у бальніцы ў Данііла знайшлі павышаны ўзровень цукру ў крыві. То-бок, фактычна, дыябет, пра які ён і сам не ведаў — да дактароў яго было не зацягнуць.
І другое. Я гаварыў з дактарамі, і ўпэўнены, што яны зрабілі ўсё патрэбнае, каб выратаваць Даніілу жыццё».
Хаваць Данііла будуць сябры ў Віцебску. Бацькі і сястра не паедуць у Беларусь праз закрытыя межы.
Тым часам расійскія тэлеграм-каналы падхапілі эмацыйны допіс бацькі хлопца. Паплечнік расійскіх ліберальных палітыкаў, экс-журналіст НТВ Антон Красоўскі напісаў у тэлеграме: маўляў, калі ў Беларусі здарылася такая сітуацыя, то ці павінна існаваць сама Беларусь? Гэта паведамленне рэпосцяць прарасійскія каналы, арыентаваныя на беларускую аўдыторыю.
Галыгіна прымусілі апраўдвацца за зварот да сілавікоў у 2020-м17
Каментары