Блогеру Сяргею Пятрухіну выставілі абвінавачванне па трох артыкулах Крымінальнага кодэкса
Праваабаронцам стала вядома, што брэсцкаму блогеру Сяргею Пятрухіну выстаўлена абвінавачванне па трох артыкулах Крымінальнага кодэксу — 342, 369 і 391.
- ч. 1 арт. 342 КК РБ - Арганізацыя ці актыўны ўдзел у групавых дзеяннях, якія груба парушаюць грамадскі парадак. Караецца штрафам, або арыштам, або абмежаваннем волі на тэрмін да 3 гадоў, або пазбаўленнем волі на той жа тэрмін.
- арт. 369 КК РБ - Публічная абраза прадстаўніка ўлады ў сувязі з выкананнем ім службовых абавязкаў. Караецца грамадскімі працамі, або штрафам, або папраўчымі работамі на тэрмін да 2 гадоў, або арыштам, або абмежаваннем волі на тэрмін да 3 гадоў.
- арт. 391 КК РБ - Абраза суддзі або народнага засядацеля ў сувязі з ажыццяўленнем імі правасуддзя. Караецца штрафам, або папраўчымі работамі на тэрмін да 2 гадоў, або арыштам, або абмежаваннем волі на тэрмін да 3 гадоў.
Паводле папярэдняй інфармацыі, артыкулы аб «абразе суддзі» і «абразе прадстаўніка ўлады» тычацца падзей двухгадовай даўніны.
Сяргея Пятрухіна затрымалі 16 чэрвеня і адправілі адбываць прысуджаны раней 15-суткавы арышт. Пазней высветлілася, што ён стаў фігурантам крымінальнай справы па арт. 342 КК РБ, якая была заведзена пасля інцыдэнту ў Гродне 29 траўня. 25 чэрвеня Пятрухін быў дастаўлены ў ізалятар часовага ўтрымання Мінска, а адтуль пераведзены ў СІЗА-1 на вул. Валадарскага, дзе знаходзіцца дагэтуль.
Праваабарончая супольнасць Беларусі прызнала Сяргея Пятрухіна, як і іншых затрыманых блогераў, палітычным зняволеным.
Сяргей Пятрухін у красавіку 2019 года ўжо быў асуджаны па крымінальнай справе. Яго прызналі вінаватым па ч. 2 арт. 188 («Паклёп») і ч. 2 арт. 189 («Абраза») і прысудзілі вялікі штраф. Праваабаронцы прызналі тую справу палітычна матываванай.
Цяпер чытаюць
«Усё так ці інакш будзе вырашацца на полі бою». Чым будзе займацца новая кіраўніца Місіі дэмакратычнай Беларусі ва Украіне?14
Каментары