Лукашэнка пра Крым: Гэта ж твая зямля, твае людзі, як ты мог за яе не ваяваць?
«Што вы адчулі, калі даведаліся, што Крым усё? Вы не адчулі, што звон можа празвінець і па Беларусі?» — запытаў Аляксандра Лукашэнку Дзмітрый Гардон.
— Не. Ніколі, і нават цяпер, нягледзячы на гэтыя вострыя ўзаемаадносіны. Ніколі! Таму што я ведаў дэталі, не ўсё там было так, як вы сёння сабе гэта ўяўляеце: «Ах, спланавалі, захапілі, і іншае». Вы проста безалаберна, бесталкова ставіліся да тэрыторыі і адносіліся да Крыма. Я сам часта ставіў сябе на месца вашых кіраўнікоў — ды калі б у мяне нават кавалак зямлі паспрабавалі забраць! Ды там бы ўжо палеглі тысячы чалавек! Гэта твая зямля, твае людзі, як ты мог не ваяваць, — адказаў Лукашэнка.
Гардон пацікавіўся, ці ведае ён прозвішчы людзей, якія адказныя за здачу Крыма.
— Ніколі не цікавіўся, але здаць Крым маглі толькі кіраўнікі вашай краіны, а ўсё астатняе — гэта дэталі. Ты кіраўнік краіны. Ты ведаў, што адбываецца вакол, гэта адбывалася не першы дзень, ты павінен быў прывесці ўзброеныя сілы па ўсёй краіне ў ступень павышанай баявой гатоўнасці, — заявіў Лукашэнка.
Дзмітрый Гардон спаслаўся на словы ў той момант в.а. прэзідэнта Украіны Аляксандра Турчынава, які заявіў, што «нам не было чым абараняць Крым».
— Што пісталетаў-аўтаматаў не было? Артылерыі не было ў Крыме?
— Мне Турчынаў сказаў: «Дык гэта ж у рускіх страляць».
— Якія рускія? Адкуль ён ведае, што там рускія былі? Гэтыя людзі прыйшлі захапіць тваю тэрыторыю!
— Страляць?
— Не, страляць — гэта апошняя справа, але ён жа да стральбы нічога не зрабіў. Ён павінен быў іх затрымліваць, у рукапашную, з нажамі, з рыдлёўкамі, палкамі! Але калі немагчыма — бяры зброю і страляй!
— Але Турчынаў мне казаў, што заходнія кіраўнікі казалі, што « ні ў якім разе не супраціўляйцеся…»
— А ён хто? Найміт Захаду або кіраўнік краіны? Ты — кіраўнік краіны, ты сваю краіну павінен абараніць і забяспечыць. Ну можа хтосьці тыпу Ангелы Меркель яму і сказаў, што ты там акуратней. Але Ангела Меркель што, была пагружаная ў сітуацыю? Яна казала, як ёй лепш. Скажы яна «Страляй», яе б пачала крытыкаваць дэмакратычная грамадскасць у Германіі, яны заўсёды гэтага баяцца. У цябе свая галава на плячах, ты кіраўнік краіны, ты за яе адказваеш! І глупства гэта ўсё, Дзмітрый, што ў рускіх страляць! Калі б вы занялі тады жорсткую пазіцыю, ніякай стральбы не было. Па-першае, для таго каб страляць у рускіх, трэба каб яны пачалі ў цябе страляць. Ніколі б рускія не пачалі ў Крыме страляць. Але гэтыя «зялёныя чалавечкі» высадзіліся і пайшлі — пад вашы апладысменты. Яны атачылі некалькі вашых баз, а вы нават з іх не павылазілі. Хіба так абараняюць сваю зямлю?
Каментары