Прэзідэнт Літвы Гітанас Наўседа на прэс-канферэнцыі 12 жніўня адрэагаваў на падзеі апошніх дзён у Беларусі. Ён прадставіў план з 3 пунктаў, які ўрэгуляваў бы сітуацыю ў суседняй краіне, піша Delfi.lt.
Кіраўнік краіны сказаў, што перад прэс-канферэнцыяй размаўляў з прэзідэнтам Латвіі.
«Я павінен канстатаваць, што сітуацыя ў Беларусі па-ранейшаму турбуе, па-ранейшаму ліецца кроў, людзей пераследуюць, журналістаў закрываюць у турмы. Мы як суседзі разам з іншымі краінамі рэгіёну шукаем спосабы вырашэння гэтага крызісу», — сказаў ён.
«Хачу прадставіць план з 3 пунктаў, які можа стаць прэлюдыяй для пасярэдніцтва прэзідэнтаў краін рэгіёна ў вырашэнні беларускага крызісу», — працягнуў кіраўнік краіны.
«Па-першае, дзяржаўныя органы ўлады павінны спыніць гвалт у дачыненні да сваіх грамадзян.
Па-другое, беларуская ўлада павінна адпусціць затрыманых, цяпер вядома пра тысячы затрыманых.
І трэці пункт — Беларусь павінна аднавіць дыялог з грамадзянскай супольнасцю», — сказаў Наўседа.
Ён заўважыў, што аснова для дыялогу — фарміраванне нацыянальнай рады з прадстаўнікоў улады і грамадзянскай супольнасці. «Гэта рада павінна заняцца пошукам рашэнняў і выхаду з крызісу», — сказаў Наўседа.
«Калі гэтыя пункты паслужаць пачатку дыскусіі, то разам са мной пасярэднічаць у вырашэнні гэтай сітуацыі пагодзяцца таксама прэзідэнты Латвіі і Польшчы», — працягнуў ён.
Наўседа сказаў, што праблему трэба вырашаць мірным шляхам, але ёсць і іншы шлях. «Думаю, мы так павінны дзейнічаць — пачаць са спосабу пошуку рашэння мірным шляхам і імкнуцца вырашыць праблему найменш балючым спосабам.
Але калі гэтая ініцыятыва не будзе прынятая, вядома ж, можа быць так, што застануцца іншыя альтэрнатывы, пра якія зараз гавораць і ў Літве, і ў ЕС.
Я кажу ў тым ліку і пра санкцыі — як на ўзроўні ЕС, так і пра нацыянальныя», — працягнуў прэзідэнт.
Ён падкрэсліў, што ў першую чаргу прапануецца мірнае вырашэнне праблемы. Калі спатрэбіцца, потым пяройдуць да іншых.
Цяпер чытаюць
«Часцей за ўсё жучок ставяць недалёка ад разетак». Як сілавікі праслухоўваюць беларусаў па тэлефоне і ў кватэрах13
Каментары