Лукашэнка ўсё ж прыехаў на канцэрт на «Мінск-Арэне» і расказаў пра закрыццё мяжы з Захадам
Лукашэнка з'явіўся ў «Мінск-Арэне» на канцэрце ў сваю падтрымку пасля прэм'еры песні Ірыны Дарафеевай «Любімую не отдают».
Хаця яшчэ не так даўно Наталля Эйсмант казала, што Лукашэнка не прыедзе. Маўляў, Лукашэнка займаецца пытаннем сумесных ваенных вучэнняў з Расіяй.
— Стэлефанаваліся, мне кажуць, мы яшчэ шумім! Так я прыняў рашэнне па дарозе, пераапрануўся і прыехаў на гэты форум, каб сказаць некалькі слоў вам! — звярнуўся да ўдзельнікаў форуму Лукашэнка. — Я вельмі цаню тое, што адбываецца цяпер у гэтай зале. Вы нават не ўяўляеце, якую яркую старонку ў гісторыю новай Беларусі вы ўпісалі, тут сабраўшыся! Вы пішаце нашу гісторыю!
«Я вам клянуся: ніякай маны на выбарах не было, — сказаў ён. — Нельга фальсіфікаваць 80%».
«Нібыта на Акрэсціна яны кагосьці пабілі, кагосьці забілі… Амапаўцы на Акрэсціна ніколі не былі. Там дзяжураць вайскоўцы ўнутраных войскаў. Амапаўцы, гэтыя рабяты сарвалі бліцкрыг пад бел-чырвона-белымі сцягамі», — выказаўся ён.
Пра рэзалюцыю Еўрапарламента ён заявіў: «Мы правялі выбары па Канстытуцыі і не маем патрэбы ні ў якім прызнанні».
«Мы не ведаем, што яны выкінуць далей… Таму мы вымушаныя адвесці войскі з вуліц, паўарміі паставіць пад ружжо і закрыць дзяржаўную мяжу з Захаду, з Літвой, Польшчай, узмацніць дзяржаўную мяжу з Украінай», — сказаў Лукашэнка.
«Я хачу звярнуцца да народаў Польшчы, Літвы, Украіны: спыніце сваіх звар'яцелых палітыкаў, не дайце развязацца вайне!» — працягнуў ён.
Каментары