Віктар Бабарыка ў няволі ўдасканальвае беларускую мову і дае ўрокі англійскай для пачаткоўцаў
Пра гэта ён напісаў у адным з лістоў на волю, які атрымала Настасся з Мінска. Вось некалькі фрагментаў з ліста ад 19 кастрычніка.
— Мне вельмі прыемна чытаць, што гэты год для нашай краіны стаў незвычайным, і мы пачалі змены і рух у правільным кірунку. І хоць у нас шмат балот, і прабівацца праз іх складана, і здаецца, атрымліваецца не вельмі хутка, але я веру, што большая частка людзей зразумела, што трэба выбірацца з гэтай багны. А значыць, усё правільна і зроблена не дарма.
— Так ужо атрымалася, што мне таксама ўдалося ўбачыць восеньскі Мінск і прыроду. Гэта і на самай справе вельмі прыгожа!
Тым больш што я ўжо пісаў пра восень як маю любімую пару года. І я таксама не люблю спякоту, але ацаніць лета гэтага года (хоць і не па надвор'і) магу толькі станоўча:)
— Некалькі слоў пра маё здароўе. Усё больш-менш стабільна, і гэта нават можна было пабачыць па БТ:) Так што ўсе пытанні з гэтай нагоды, спадзяюся, адпалі.
— Мае заняткі тут вельмі стандартныя: чытанне, пісанне, павышэнне кампетэнцый у беларускай і англійскай мовах. Дарэчы, я тут таксама арганізаваў курсы англійскай для пачаткоўцаў:)
Шахматы і шашкі ёсць, але няма партнёраў:( Таму проста разыгрываю партыі з кніжак. Хоць пару дзён партнёр па шахматах і шашках быў. Так што ўспомніў і рэальную гульню.
— Усім прывітанне і маё захапленне імі! Разам — пераможам!
Каментары