Два гады хатняй «хіміі» і 2000 рублёў кампенсацыі. Асудзілі мужчыну за абразу валожынскага міліцыянера
Мінскі раённы суд 1 лютага вынес прысуд па крымінальнай справе Аляксандра Дзяшчэні. Яго абвінавацілі у абразе прадстаўніка ўлады (арт. 369 Крымінальнага кодэкса), паведамляюць праваабаронцы.
Справу разглядала суддзя Алена Новікава. Дзяржаўны абвінаваўца — пракурор Фаміна.
З матэрыялаў следства вядома, што 20 верасня Дзяшчэня наўмысна, з дапамогай тэлефона размясціў у суполцы газеты «Радзіма» УКантакце паведамленне зневажальнага характару, з выкарыстаннем ненарматыўнай лексікі.
Пацярпелы — супрацоўнік міліцыі Павел Курс.
На папярэднім судовым пасяджэнні дзяржаўны абвінаваўца запрасіў для Аляксандра Дзяшчэні два гады абмежавання волі без накіравання ва ўстановы адкрытага тыпу.
Суддзя Алена Новікава вынесла прысуд: два гады абмежавання волі без накіравання ва ўстановы адкрытага тыпу. Апроч гэтага Дзяшчэня павінен выплаціць пацярпеламу 2000 рублёў кампенсацыі маральнай шкоды. Арышт на тэлевізар, тэлефон і мікрахвалёўку пакінуць у сіле.
Каментары