Былую начальніцу ўпраўлення культуры Магілёўскага гарвыканкама Ірыну Жабараву прызналі вінаватай у атрыманні хабараў. Ёй прызначылі пакаранне — 5 гадоў калоніі агульнага рэжыму, пазбаўлення права займаць кіруючыя пасады 5 гадоў і штраф 500 базавых, піша Tut.by.
Раней арыштаваныя кватэра, дом і дзве машыны Жабаравай застаюцца пад арыштам. Жанчына віну не прызнала. Яна заявіла, што будзе абскарджваць прысуд.
Нагадаем, пра затрыманне былой начальніцы ўпраўлення культуры Магілёўскага гарвыканкама Ірыны Жабаравай стала вядома ў сакавіку 2020 года. У лістападзе 2020 пачаўся суд над ёй — Жабараву абвінавацілі ў атрыманні хабараў на суму больш за 31 тысячу рублёў. Ёй ставяць у віну 8 эпізодаў атрымання хабараў.
Паводле абвінавачвання і следства, Жабарава, знаходзячыся на кіраўніцкай пасадзе, атрымлівала хабар з 2015 па 2020 год. Усяго чыноўніца, паводле агучаных звестак пракуратуры, 8 разоў атрымлівала хабар ад дырэктара прадпрыемства «Арт-канцэрт» Мажэйкі і экс-дырэктара «Лазерных шоу-сістэм» Аляксандра Ляксакава за ўдзел іх кампаній у арганізацыі і правядзенні культурна-масавых мерапрыемстваў, якія праводзяцца Магілёўскім гарвыканкамам і яго структурнымі падраздзяленнямі. Згодна з матэрыяламі справы, Жабарава прымала грошы ў падземным пераходзе каля станцыі метро «Магілёўская» ў Мінску, паблізу хуткасных аўтатрас, у сваім службовым кабінеце, ля гіпермаркета «Е-сіці» ў Магілёве.
У судзе Ірына Жабарава заяўляла аб сваёй невінаватасці, пра ціск з боку КДБ і спробы вярбоўкі яе з мэтай шпіянажу за кіраўніком адміністрацыі горада і яго падначаленымі.
Экс-гендырэктар ЗАТ «Лазерныя шоу-сістэмы» Аляксандр Ляксакаў праходзіць па справе як давальнік хабару. Яго абвінавачваюць у перадачу чыноўніцы 550 рублёў. Ён прызнаў віну, напісаў яўку з павіннай і не знаходзіцца пад вартай. У апошнім слове Ляксакаў падрабязна распавёў, чаму раскайваецца і «гатовы панесці заслужанае пакаранне».
Дзяржабвінавачанне патрабавала для Жабаравай 6 гадоў калоніі строгага рэжыму, штраф 500 базавых велічынь і пазбаўленне яе права займаць кіруючыя пасады на 5 гадоў. На думку пракурора Таццяны Касцюшкі, віна падсуднай даказаная.
Аляксандра Ляксакава абвінавачванне папрасіла аштрафаваць на 400 базавых велічынь.
Цяпер чытаюць
Знойдзена цела супрацоўніцы віцебскай хіміі — яе шукалі два з паловай гады1
Каментары