Мігрантаў водзяць у душ і на прагулкі, журналісты спяць на падлозе. Алег Груздзіловіч расказаў пра 10 сутак на Акрэсціна
Журналіст Алег Груздзіловіч 26 ліпеня выйшаў на свабоду. Ён застаецца падазраваным па арт. 342 КК (дзеянні, якія парушаюць грамадскі парадак).
На Акрэсціна ён знаходзіўся ў нечалавечых умовах, разам з калегамі, якія працавалі на «Радыё Свабода» абвесціў нават галадоўку. Вось што ён расказаў пра свае апошнія дні.
«Уварваліся раніцай у кватэру. Грукат у дзверы: я адразу падняўся. Не тое, каб чакаў, але прадбачыў такое.
Супрацоўнікі ў цывільным ўжо увайшлі ў тамбур, я адчыняў дзверы спакойны, але мяне схапілі, адзін, здаецца, сказаў: «САХР!», хоць сахраўцаў у форме там я не бачыў.
Другі кажа: «Міліцыя!» У кватэру ўварвалася 7 чалавек, на мяне накінулі кайданкі. Правялі ператрус, забралі тэхніку і ўсе наяўныя грошы. Адвезлі ў СК, я адмовіўся ад дачы паказанняў без адваката. Выклікалі дзяжурнага абаронцу. І пасля 10 сутак на Акрэсціна.
Па 342 артыкуле тут шмат. Таксама шмат людзей па «тэрарыстычнай справе» аб падрыве ў Вілейцы. Па ёй сядзеў доктар, які займаўся пейнтболам, нейкі аспірант БНТУ… Забіраюць усіх, пры хоць якім падазрэнні. Праўда, пасля і адпускаюць: ведаю, што і доктар, і аспірант ужо на волі».
Спачатку Груздзіловіча завялі ў камеру, дзе быў праваабаронца Валянцін Стэфановіч, яны абняліся, але праз хвіліну журналіста вывелі ў іншую камеру. Там быў нашанівец Андрэй Скурко. «Яму цяжка, ён інсуліназалежны, мае праблемы са здароўем», — тлумачыць Груздзіловіч.
Пасля ёй быў у адной камеры з калегам Алегам Дашчынскім. Калі яны даведаліся, што журналіст Іна Студзінская трымае галадоўку, далучыліся да яе.
«Палітычным не выдаюць бялізну, матрасы. Калі ў камеру да палітычных трапляюць крымінальнікі, у іх таксама забіраюць матрасы.
Ад адваката я даведаўся, што нам перадалі перадачы. Але іх нам ніхто не аддаў. Казалі: гэта прыдумкі, што вам штосьці перадалі.
На шпацыр ці ў душ палітычных таксама не водзяць», — кажа Алег. Пры гэтым мігранты, якіх утрымліваюць у суседніх камерах, маюць пасцельную бялізну, іх выводзяць і на прагулкі, і ў душ.
Цяпер чытаюць
Сталі вядомыя новыя дэталі ў маштабнай справе арганізатараў канцэртаў4
Каментары